به‌پێی ئه‌و به‌ڵگه‌نامه‌ نهێنیانه‌ی هه‌واڵگری به‌ریتانیا كه‌ به‌م دواییانه‌ په‌رده‌یان له‌سه‌ر هه‌ڵماڵراوه‌و له‌میدیاكانی ئه‌و وڵاته‌ بڵاوكراونه‌ته‌وه‌، پادشای ئوردن پێشنیازی بۆ له‌نده‌ن و واشنتۆن كردوه‌ سیستمی پادشایه‌تی بۆ عێراق بگه‌ڕێنرێته‌وه‌.

هەواڵ:KNNC

به‌پێی راپۆرتێكی ڕۆژنامەی میدڵ ئیست مۆنیتەردا، شاعه‌بدوڵای پادشای ئوردن له‌سه‌روبه‌ندی رووخانی رژێمی پێشوی عیراق پێشنیازی بۆ هه‌ریه‌ك له‌تۆنی بلێری سه‌رۆكوه‌زیرانی ئه‌و كاته‌ی به‌ریتانیا و جۆرج بوشی سه‌رۆكی ئه‌مریكا كردوه‌ ده‌سه‌ڵاتی پادشایه‌تی بۆ عیراق بگه‌ڕێننه‌وه‌ و بۆ ئه‌و مه‌به‌سته‌ش شازاده‌ حه‌سه‌نی مامی وه‌ك پادشا بۆ عێراق دیاری بكه‌ن.

به‌پێی هه‌مان سه‌رچاوه‌ تۆنی بلێر ڕاستەوخۆ بیرۆکەی دامەزراندنی دەسەڵاتی پاشایەتی هاشمی لە عێراق ڕەت نەکردۆتەوە و ئاماژەی بەوەشکردووە، ناکۆکییەکە لەسەر کەسایەتی شازادە حەسەن بووە، کە حکومەتی بەریتانیا ڕەتیکردووەتەوە.

هاوكات شارەزایانی بەریتانیا تۆنی بلێریان ئاگادارکردەوە کە گه‌ڕانه‌وه‌ی سیستمی پادشایه‌تی  و ده‌سه‌ڵاتی  هاشمی بۆعێراق ره‌نگه‌ ببیته‌ هۆی سه‌رهه‌ڵدانی ناكۆكی چونكه‌ له‌نێو خودی بنه‌ماڵه‌ی ده‌سه‌ڵاتی هاشمی له‌ئوردن ناكۆكی له‌سه‌ر ده‌سه‌ڵات هه‌یه‌.