لە چەند مانگێکدا دەیان گۆڕی بەکۆمەڵ بە هەزاران ڕوفاتەوە دۆزراونەتەوە و تەنها لە حومس نزیکەی هەزار و 300 ڕوفات لەنێو گۆڕەکاندابوون.

هەواڵ:KNNC

ڕوانگەی سوریی بۆ مافەکانی مرۆڤ ڕایگەیاند: لەدوای ڕووخانی ڕژێمی بەشار ئەسەدەوە تا ئێستا، 45 گۆڕی بەکۆمەڵ لە ناوچە جیاوازەکانی سوریادا دۆزراونەتەوە کە ڕوفاتی پێکهاتە جیوازەکانی سوریایان تێدابووە.

ڕوانگەکە ئاماژەی بەوەداوە، لەنێو ئەو گۆڕەبەکۆمەڵانەدا، دوو هەزار و 835 ڕووفات هەبوون کە ژن و مناڵ و توێژە جیاوازەکانیان لەخۆگرتوە.

بەپێی ڕاگەیەندراوەکەی ڕوانگەی سوریی، زۆرترین ڕوفات لە حومس بووە کە هەزار و 258ڕوفات هەبووە، ئەوانی دیکەش، گۆڕەکانی (دیمەشق هەزار و 25 ڕوفات، دێرەزوور شەش گۆڕ 114 تەرم، گوندەکانی دیمەشق  212 ڕوفات، حەمما 44 ڕوفات، درعا141 ڕوفات، ئیدلب 10 ڕوفات، حەلەب 4 ڕوفات)یان تێدایە.

ڕوانگە بانگەوازیی لە کۆمەڵگەی نێودەوڵەتیی کردوە بۆ لێکۆڵینەوە لە تاوانەکانی دەسەڵاتی پیشوو، بە سزاگەیاندنی سەرجەم تاوانکارانی کەیسی کۆمەڵکوژکردن و ڕادەستکردنی سورییەکان، بە مەرجی پاراستنی ئەو شوێنانە وەک بەڵگەی تاوانکاریی، هاوکات، هاوکاربن لە ناسینەوەی قوربانییەکان و ڕادەستکردنەوەیان بە خێزانەکانیان...