بەشەخۆراکی نزیکەی نیوملیۆن کەس ڕاگیراوە و وەزارەتی بازرگانییش ڕایدەگەیەنێت: بەشێکیان بەتەواوەتی بێبەشدەبن و هەندێکیشیان دوای ماوەیەک دووبارە وەریدەگرن.

هەواڵ:KNNC

محەممەد حەنون وتەبێژی وەزارەتی بازرگانی عێراق ڕایگەیاند: لە سەراسنەری وڵات بەشەخۆراکی نزیکی 500 هەزار کەس ڕاگیراوە بەهۆی پڕۆسەی نوێکردنەی شێوازی وەرگرتنی خۆراک و سیستمی بە ئەلیکترۆنییکردن.

ئاماژەی بەوەشدا، هۆکاری بڕین یاخود ڕاگرتنی بەشەخۆراک جیاوازە، بەشێکیان مەرجەکانی وەرگرتنی بەشەخۆراک نایانگرێتەوە بە هۆیەکانی بەرزی موچە و بوونی کاری باش و داهاتی بەرز، یاخود گەشتیاربوون و ناسنامە نادیاریی، کە ئەوانە بە هیچ جۆرێک جارێکی دیکە سودمەند نابن لە وەرگرتنی بەشەخۆراک.

وتەبێژەکەی وەزارەت ڕوونیکردوەتەوە، پڕۆسەی بە ئەلیکترۆنیکردنی فۆڕمی خۆراک، کە نوێکردنەوە و گواستنەوەن، لە هۆکارەکانی دیکەی بڕان و ڕاگرتنی بەشەخۆراکن، ئەو هاووڵاتییانەشی بەشەخۆراکیان لەو چوارچێوەیەدا بڕاوە لەپاش پڕۆسەی نوێکردنەوەکە، بەشەخۆراکیان بۆ دەگەڕێتەوە.

لە کۆتاییشدا وتویەتی، لە نزیکترین کاتدا وەزارەت داواکاریی لابردنی ڕاگرتن بۆ ئەپڵیکەیشنی بەشەخۆراک زیاد دەکات و هاوڵاتییانی شایستە دەتوانن، لەڕێگەی پێشکەشکردنی بەڵگەنامەکانیانەوە، دووبارە سودمەندبن لە وەرگرتنی بەشەخۆراک...