میدیا ئیسرائیلییەکان بڵاویانکردوەتەوە  سوپای ئیسرائیل تا شەشـی ئۆکتۆبەر بەتەواوەتی شاری غەززە گەمارۆدەدات، بەڵام شەڕکردن چەند مانگێک درێژە دەکێشێت و بە ئاسانی کۆتایی نایەت، لە زاری هەواڵگری ئیسرائیلیشەوە ئاشکرایان کردوە، حەماس دەستیکردوە بە دروستکردنی تونێلی نوێ و خۆی بۆ شەری درێژخایەن ئامادەکردوە. 

هەواڵ:KNNC


ئەمڕۆ پێنجشەممە، ڕۆژنامەی یەدیوت ئەحرۆنۆتی لە زاری بەرپرسانی بەشی لێکۆڵینەوە لە بەڕێوەبەرایەتی هەواڵگری سەربازی ئیسرائیل بڵاویکردەوە، "تا شەشی ئۆکتۆبەر گەمارۆدانی شاری غەززە و چۆڵکردنی دانیشتوانەکەی تەواو دەبێت"، بەڵام ئۆپەراسیۆنەکە "داگیرکردنی تەواو"ی شاری غەززە پێکناهێنێت.

ئاماژەی بەوەشکردوە  کۆنترۆڵکردنەوەی تەواوی شاری غەززە تا دوای ئەو رێکەوتە دەست پێناکات و پێشبینی دەکەن شەڕ لەو شارە بۆ چەند مانگێک بەردەوام دەبێت. ڕۆژنامە ئیسرائیلییەکە  لە زاری هەواڵگری ئیسرائیلەوە  پشتڕاستیکردوەتەوە کە لە ئێستادا لانیکەم 7500 ئەندامی حەماس و جیهادی ئیسلامی (نزیکەی پێنج هەزار کەس لە حەماس و دوو هەزار و 500 کەس کەسی خۆبەخش) لە شاری غەززەدان و ئامادەی شەڕن.

بەگوێرەی ڕۆژنامەکە، ئەم وردەکارییانە لە میانی کۆنگرەیەکی نهێنی لە بەردەم لیژنەی دەرەوە و بەرگریی ئیسرائیلی ڕۆژی چوارشەممەدا هاتون.

میدیاکەی ئیسرائیل لە ڕاپۆرتەکەیدا ئەوەشهاتوە؛ کە   حەماس ئۆپەراسیۆنی نوێی دامەزراندنی سەربازی ئەنجام دەدات و تونێلەکان دروستدەکاتەوە و لێکۆڵینەوە لە شەڕەکانی پێشو دەکات و تەقەمەنی ئامادە دەکات بۆ شەڕێکی درێژخایەن لە شاری غەززە و باکووری کەرتەکە.