میدیاکانی ئێران ئاشکرایان کرد: عەلی لاریجانی، ئەمینداری ئەنجوومەنی باڵای ئاسایشی نەتەوەیی ئێران بۆ واژۆکردنی ڕێککەوتنێکی ئەمنی گەیشتووەتە بەغداد.

هەواڵ: KNNC

عەلی لاریجانی، سکرتێری ئەنجومەنی باڵای ئاسایشی نیشتمانیی ئێران، پێش ئەوەی بەرەو عێراق بڕوات، جەختی لەوە کردەوە کە "ئاسایشی وڵاتەکەی پەیوەستە بە ئاسایشی دراوسێکانیەوە".

لاریجانی بەر لە سەردانەکەی بۆ عێراق و لوبنان کە سێ ڕۆژ دەخایەنێت، ڕایگەیاند کە "ڕێککەوتنی ئەمنی نێوان تاران و بەغدا ئامادە دەکرێت و لەم سەردانەدا واژۆ دەکرێت.

بەپێی زانیارییەکان، لاریجانی بە ئامانجی گفتوگۆکردن لەبارەی پێشهاتە نوێکانی ناوچەکە گەیشتووەتە عێراق و دەچێتە لوبنانیش، هەوڵ دەدات پەرە بە پەیوەندییە بازرگانییەکانی ئێران لەگەڵ ئەو وڵاتانە بدات، هاوکات گۆڕانکارییەکانی بواری ئەمنی لەگەڵ بەرپرسانی عێراق و لوبنان گفتوگۆ دەکات.

سەردانەکەی لاریجانی، لەچوارچێوەی ڕێککەوتنە ئەمنییەکانە لەبارەی ئاڵۆزییەکانی ناوچەکە ، لەگەڵ ئەو خواستەی ئێران هەیەتی بۆ پەرەپێدانی پەیوەندییەکانی لەگەڵ بەغدا و ڕێگریی لە هەڕەشەکانی سەر سنووری نێوان هەردوو وڵات.

 لاریجانی بەر لە سەردانەکەی بۆ عێراق لە کۆنگرەیەکی ڕۆژنامەنووسیدا ڕایگەیاند:   ئاسایشی ئێران بەندە بە ئاسایشی دراوسێکانیەوە.

وتیشی: پەیوەندییەکانی نێوان عێراق و ئێران لە ئاستێکی باڵادایە، نموونەی ئەوەش چلەی ئیمام حوسەینە کە لەلایەن عێراقەوە پێشوازییەکی گەرم لە زیارەتکاران دەکرێت و ئێمە سوپاسگوزارین.

بڕیارە لاریجانی دوای عێراق سەردانی لوبنان بکات و لەهەردو وڵات سێ رۆژ دەمێنێتەوە
لاریجانی پەیوەست بە لوبنان وتی: "لوبنان وەک ئێران، مێژووی ململانێی لەگەڵ قەوارەی زایۆنیستی هەیە".