نەتانیاهۆ بە میدیای ئەمەریکی ڕاگەیاندوە، زۆر خاڵی هاوبەش هەیە لە نێوان ئەو ترەمپدا و بیرکردنەوەکانیان لەیەکەوە نزیکە، ئەو دەڵێت؛ هەردوکمان باوەڕمان بەوە هەیە، دەبێت ئاشت لە ڕێگەی هێزەوە بەدیبێت، هێز لە پێش هەمو شتێکەوەیە و دواتر ئاشتی دێت.


هەواڵ:KNNC

ئەمڕۆ چوارشەممە، بنیامین نەتانیاهۆ، باسی لە خاڵە لێکچوەکانی خۆی ترەمپ کردوە و بۆ کەناڵ فۆکس بزنسی ئەمەریکی و وتویەتی؛ "من و ترەمپ باوەڕمان بە بنەمای ئاشتی لە ڕێگەی هێزەوە هەیە، هێز لە پێش هەموو شتێکەوەیە، پاشان ئاشتی".

سەرۆکوەزیرانی ئیسرائیل ئەوەشی باسکردوە، لەم پێشهاتانەی دوایدا، هێزێکی زۆریان نیشان داوە و  پێیان وایە ئاشتی بەرهەمی زۆری هەیە،  جەختیکردوەتەوە کە دەتوانن مەودای ڕێککەوتنەکانی ئیبراهیم فراوانتر بکەن و واقیعێکی باوەڕپێنەکراو لە ڕۆژهەڵاتی ناوەڕاست دروست بکەن، واقیعێک کە خۆشگوزەرانی و سەقامگیری دەهێنێت.



لە بارەی ئاگربەستی غەززەشەوە، ناوبراو گەشبین بوە و ئاماژەی بەوەکردوە؛ جانسی گەیشتن بە ڕێککەوتن زۆرە، بۆ ڕاگرتنی شەڕ لە غەززە و ئازادکردنی تەواوی بارمتەکان.


ئەمە لەکاتێكدایە پێشتر بەرپرسێکی ئیسرائیلی بە ڕۆژنامەی تایمزی ئیسرائیلی ڕاگەیاندبو، خاڵی ناکۆکی نێوان حەماس و وڵاتەکەی ئەوەیە  ئەوان پێداگری لەسەر هێشتنەوەی هێزەکانیان دەکەن  لە دەروازەی مۆراگ لە باکوری ڕەفەح، ئەمەش هەڵوێستێکە کە حەماس ڕەتیدەکاتەوە.