سەرۆکى هەرێمى کوردستان و وەزیرى دەرەوەى ئێران، بە تەلەفۆن جەنگى ئیسرائیل و ئێرانیان تاوتوێ کرد، سەرۆکى هەرێمى کوردستان داوا دەکات، رێوشوێنى بەپەلە بگیرێتە بەر بۆ رێگریى لە زیاتر پەرەسەندنى جەنگ.

هەواڵ:KNNC

وەزارەتى دەرەوەى ئێران، لە راگەیەنراوێکدا بڵاوى کردەوە، نێچیرڤان بارزانی، سەرۆکی هەرێمی کوردستان و عەباس عێراقچی، وەزیری دەرەوەی ئێران، بە تەلەفۆن قسەیان کردوە.

وەزارەتی دەرەوەی ئێران دەڵێت: لە پەیوەندییە تەلەفۆنییەکەدا، بارزانى و عێراقچی، باسیان لە جەنگى نێوان ئیسرائیل و ئێران کردوە کە رۆژی هەینی بە هێرشی ئیسرائیل بۆ سەر ئێران دەستی پێکرد و ئاماژەى بەوەش کردوە: نێچیرڤان بارزانی داوای گرتنەبەری رێوشوێنی بەپەلە و کاریگەری لەلایەن کۆمەڵگەی نێودەوڵەتییەوە کردوە بۆ رێگریکردن لە پەرەسەندنی زیاتری جەنگ.

هەر بە پێی ڕاگەیەنراوەکەى وەزارەتى دەرەوەی ئێران، عێراقچى، سوپاسی سەرکۆنەکردنی دەستدرێژییەکانی ئیسرائیلی بۆ سەر ئێران لەلایەن عێراق و هەرێمی کوردستانەوە کردوە و جەختیشی کردوەتەوە لەوەى، ئێران تا راگرتنی دەستدرێژییەکانی ئیسرائیل، لە ئۆپەراسیۆنە بەهێزەکانی بۆ بەرگریکردن لە سەروەری، ئاسایش و گەلی ئێران بەردەوام دەبێت.

بەپێی بەیاننامەیەکى سەرۆکایەتیی هەرێمى کوردستانیش کە کەمێک لەمەوبەر بڵاویکردوەتەوە؛ لە پەیوەندییە تەلەفۆنییەکەدا هەردولا باسیان لە دوايين پێشهاته‌كانى ئۆپه‌راسيۆن و روبه‌ڕوبونه‌وه سه‌ربازييه‌كانى نێوان ئێران و ئيسرائيليان تاوتوێ كردوە و ده‌رباره‌ى كاريگه‌ریی و لێكه‌وته‌كانیشى له‌سه‌ر ناوچه‌كه‌، بيروڕايان گۆڕیوەتەوە‌.

ئاماژە بۆ ئەوەشکراوە کە هه‌ردولا هاوڕابون له‌سه‌ر گرنگيى پاراستنى ئارامى و سه‌قامگيرى و دورخستنه‌وه‌ى ناوچه‌كه‌ له‌ ئاڵۆزيى زياتر جه‌ختيان كرد‌وه‌تەوە كه‌ كۆمه‌ڵگه‌ى نێوده‌وڵه‌تى رۆڵى خۆى بگێڕێت بۆ راوه‌ستاندنى كرداره‌ سه‌ربازييه‌كان و چاره‌سه‌ركردنى ئاشتييانه‌ى ناكۆكييه‌كان.