بەرپرسێکی بزوتنەوەی حەماس، رایگەیاند: دانوستانەکانی ئاگربەست لە غەززە، گەیشتونەتە بنبەست و هێشتا دۆخەکە بۆ گەیشتن بە رێکەوتن ئامادەکاری بۆ نەکراوە، دەشڵێت: نەتانیاهۆ بەنیاز نییە، کۆتایی بە ‌هێرشەکان بهێنێت.

هەواڵ:KNNC

محەممەد نەزال، ئەندامی مەکتەبی سیاسیی بزوتنەوەى حەماس لە چاوپێکەوتنێکدا لەگەڵ عەرەبی جدید ڕایگەیاند: حەمماس ناتوانێت لە بەرانبەر هاتنە ناوەوەی هێزەکانی ئیسرائیل بۆ ناو سنورەکانی کەرتی غەززە، بێدەنگ بێت، جەختیشی کردەوە لەوەی، لە ئێستادا دانوستانەکانی ئاگربەست لە غەززە لە بنبەستدان و هێشتا دۆخەکە بۆ گەیشتن بە رێککەوتن گونجاو نییە.

ئەو بەرپرسەی حەماس دەشڵێت: بنیامین ناتانیاهۆ، سەرۆک وەزیرانی ئیسرائیل و ئەمریکا، نایانەوێت شەڕەکە کۆتایی پێبێت، چونکە پێیان وایە، ئەم شەڕە هیچ کام لە ئامانجە ستراتیژییەکانی تەلئەبیبی دەستەبەر نەکردوە.

محەمەد نەزال، لەبارەی مەرجەکانی حەماس بۆ ئاگربەست وتی: خوازیاری وەستانی درێژخایەن و ڕاستەقینەی شەڕن، بەڵام پێشنیازەکەی ویتکۆف، تەنها ئاگربەستێکی کاتیی یەک هەفتەیی بۆ ئازادکردنی زیندانییە زیندو و مردوەکانی ئیسرائیل لەخۆ دەگرێت و هەر کات نەتەنیاهۆ ئیرادەى هەبێت، دەتوانێت بۆ جارێکی دیکە غەزە بکاتەوە ئامانجی دەستدرێژییەکانی.