پزیشکانی ناڕازی و دانەمەزراو لە هەولێر و سلێمانی گردبونەتەوە، ناڕازییەکان داوای دەستپێکردنەوەی پلە بەندی و دانەمەزراوەکانیش داوای دامەزراندن دەکەن.

هەواڵ:KNNC

بەیانی ئەمڕۆ ژمارەیەک لە پزیشکانی دانەمەزراو لە بەردەم ئەنجومەنی وەزیران گردبونەوە و لە کۆنگرەیەکی رۆژنامەوانیدا رایانگەیاند، لەسەرجەم شارەکانی هەرێمی کوردستان ژمارەیان نزیکەی هەزار و 600 پزیشکە، بەڵام تا ئێستاش حکومەتی هەرێمی کوردستان و وەزارەتی تەندروستی دامەزراندنی پزیشکانیان بە جدی وەرنەگرتوە و کاری پێویستیان نەکردوە.

دەشڵێن: ماوەی زیاتر لە چوار مانگە پزیشکان لە شوێنەکانی خۆیان قەتیس بون و ماوەی یاسایی کارکردنیان کۆتایی هاتووە و پێویست دەکات، پلەبەندی دەستپێبکاتەوە.

پزیشکانی ناڕازی و دانەمەزراو نا ئومێدبون لە بەڵێنەکانی وەزارەتی تەندروستی و دەڵێن: تەواوی سیستمی پلەبەندی پزیشکی تێکداوە و لە خەمی جدیدا نییە.

هۆشداریش دەدەنە حکومەت، کە پزیشکانی ناڕازی نەخۆشخانەکان چۆڵ دەکەن و هاوشانی پزیشکانی دانەمەزراو دێنە سەر شەقام و بایکۆت دەستپێدەکەن.

هاوشێوەی هەولێر، پزیشکانی ناڕازی و دانەمەزراو لەبەردەم نەخۆشخانەی شار لە سلێمانی گردبونەوە، داوا دەکەن، هەوڵی جدی بدرێت بۆ دۆزینەوەی چارەسەرێکی گونجاو و پەلە بکرێت لە دامەزراندنی پزیشکانی دەرچوی ساڵی 2024ـی زانکۆکان لەسەرتاسەری هەرێمی کوردستان بۆ ئەوەى مافى ئەوان و دانەمەزراوەکانیش نەفەوتێت، بە گەڕانەوەیان بۆ شار و ناردنی تازە دامەزراوەکان بۆ دەرەوەی شارەکان.