سەرۆککۆماری ئێران رایگەیاند، دۆناڵد ترەمپ لەلایەک باسی ئاشتی دەکات و لەلایەکی دیکەش هەڕەشەی شەڕ دەکات، جەختیشدەکاتەوە، لەگەڵ ئەمەریکا درێژە بە دانوستانە ئەتۆمییەکان دەدەن و لە هەڕەشەکانیش ناترسن.

هەواڵ:KNNC

مەسعود پزشکیان، سەرۆککۆماری ئێران لە میانی وتارێکیدا لە رێورەسمی دوەمین ساڵرۆژی گەڕانەوەی 86ـهەمین فلۆتیلای هێزی دەریایی ئێران رایگەیاند، لێدوانەکانی سەرۆکی ئەمەریکا بەتەواوی دژ بەیەکن، هەندێک جار باسی ئاشتی دەکات و هەندێکجاریش باسی شەڕ دەکات، تاران نازانێت باوەڕ بەچی بکات.

سەبارەت بە سەردانەکەی دۆناڵد ترەمپ بۆ وڵاتانی عەرەبی، پزشکیان وتی: "ترەمپ شتگەلێکی لە ناوچەکە وتوە کە جگەلەخۆی کەس باوەڕی پێناکات، لەلایەک باسی ئاشتی دەکات و لەلایەک دەڵێت، "ئێمە ئامڕازێکمان هەیە دەبێتەهۆی وێرانکاری لە جیهاندا، نازانین کام وشەیە قبوڵ بکەین، پەیامی ئاشتی یان یان پەیامی لەناوچونی مرۆڤایەتی"، ئیسرائیل بەشێوەیەکی دڕندانە 60 هەزار کەسی بێتاوانی کوشت و منداڵانی غەززەی روبەڕوی بێ نانی و بێ ئاوی و خۆراک کردوەتەوە، هەردو وڵاتیش بانگەشەی ئەوە دەکەن کە پشتگیری لە مافی مرۆڤ دەکەن".

سەرۆککۆماری ئێران دەڵێت: "دەتوانین ژێردەریایی و کەرەستەی تێکدەر و هەمو جۆرە چەک و کەرەستەیەکی پێویستی سەربازی دروستبکەین، بەبێ ئەوەی پشت بە کەسانی دیکە ببەستین، دەتوانین لەوبوارەدا هەناردەش دەستپێبکەین".

وتیشی: "ئێمە دانوستان دەکەین و بەردەوامیش دەبین، بەدوای شەڕدا ناگەڕێین، بەڵام لێی ناترسین، وەک ئەوە نییە کە ئەگەر هەڕەشەمان لێ بکرێت پاشەکشە بکەین لە مافە زەوتنەکراوەکانمان، نەخێر، دەستکەوتە شکۆمەندەکانمان لە بوارەکانی سەربازی و زانستی و ئەتۆمی و بوارەکانی تردا فەرامۆش ناکەین".