وەزیری دەرەوەی ئێران ئاشكرایكرد؛ بەراورد بە سێ گەڕی پێشوتری دانوستانەكانیان لەگەڵ واشنتۆن، ئەم گەڕی چوارەم راشكاوانەتر بوە و بەدڵنیاییەوە تاران هیچ سازشێك لەسەر پیتاندنی یۆرانیۆم ناكات.


هەواڵ: (KNNC)


دوای كۆتاییهاتنی گەڕی چوارەمی دانوستان لەگەڵ ئەمەریكا، عەباس عراقچی، وەزیری دەرەوەی ئێران بەتەلەفزیۆنی فەرمی وڵاتەكەی راگەیاند: بەراورد بە سێ گەڕی پێشوتری دانوستانەكانیان لەگەڵ واشنتۆن، گەڕی چوارەم جدی تر و راشكاوانەتر بو، ئێستا گفتوگۆكانی تاران و واشنتۆن لە بابەتە گشتییەكان تێپەڕیون و چوینەتە ناو وردەكارییەكان.


وتیشی: سەرباری سەختی دانوستانی گەڕی چوارەم، بەڵام زۆر سودبەخش بون، لەم قۆناغەدا هەردولا تێگەیشتنێكی باشتریان هەیە هەروەها بەشێكی زۆری بابەتە سەرەكییەكانی ناكۆكی نێوان وڵاتەكەی و ئەمەریكا، گفتوگۆیان لەسەركراوە و تاڕادەیەك بەیەكتر نزیك بونەتەوە.


رونیكردەوە كە؛ بڕیاریانداوە درێژە بە دانوستانەكان بدرێت، بۆ گەڕی داهاتوش بەلەبەرچاوگرتنی بەرنامەكانی تاران و واشنتۆن لەبەرچاو گیراوە، هەروەها بۆ دیاریكردنی رۆژ و شوێنی گەڕی پێنجەم لەلایەن  وەزیری دەرەوەی عومانەوە دیاریدەكرێت.


وەزیری دەرەوەی ئێران ئاماژەی بۆئەوەشكردوە؛ پرسی هەڵگرتنی سزاكان لەسەر ئێران و پیتاندنی یۆرانیۆم، دو پرسی سەرەكی دانوستانەكانن، بەدڵنیاییەوە تاران هیچ سازشێك لەسەر پیتاندنی یۆرانیۆم ناكات، بەڵام رەنگە لەبارەی ئاست و بڕەكەیەوە هەندێك سنورداركردن ئاسایی بێت.


راشیگەیاند: ئامانجی سەرەكی كۆماری ئیسلامی ئێران لە دانوستانەكان، هەڵگرتنی سزاكانە، ئەوەش جێگەی رەزامەندی هەردولایە، ئاواتەخوازن لە درێژەی دانوستانەكان بەرەپێشچونی زیاتر بەخۆیانەوە ببینن.