سەرباری دانوستانەكانی نێوان واشنتۆن و تاران لەسەر بەرنامە ئەتۆمییەكە، تەلئەبیب دەڵێت: نابێت ئێران خاوەنی مەترسیدارترین چەكی جیهان بێت، میدیا ئەمەریكییەكانیش ئاماژە بۆ ئەوەدەكەن، نەتانیاهۆ كارتی فشاری بۆ روبەڕوبونەوەی ترەمپ بەدەستەوە نییە.


هەواڵ: (KNNC)


ئەمڕۆ یەكشەممە، لە كۆنگرەیەكی رۆژنامەوانیدا لەگەڵ یۆهان وادێفول، هاوتا ئەڵمانییەكەی گیدۆن ساعر، وەزیری دەرەوەی ئیسرائیل جەختیكردەوە؛ وڵاتەکەی رەتی دەكاتەوە كە ئێران ببێت بە خاوەنی مەترسیدارترین چەكی جیهان و دەبێت رێگری لە بەدەستهێنانی ئەو جۆرە چەكە بۆ تاران بكرێت.


وتیشی: نابێت بەهیچ شێوەیەک چەكێكی مەترسیدار بكەوێتە دەست مەترسیدارترین رژێم لە جیهاندا، و پێویستە  دامەزراوەکانی پیتاندنی یۆرانیۆمی ئێران هەڵبوەشێنرێنەوە.


لێدوانەکانی وەزیری دەرەوەی ئیسرائیل هاوکاتە لەگەڵ گەڕی چوارەمی دانوستانەکانی نێوان ئەمەریکا و ئێران لە عومان.


هاوكات، میدیاكانی ئەمەریكا بڵاویانكردەوە؛ بنیامین نەتانیاهۆ، سەرۆك وەزیرانی ئیسرائیل هیچ كارتێكی فشاری بەدەستەوە نییە بۆ ئەوەی روبەڕوی دۆناڵد ترەمپ ببێتەوە.