لە ئەنجامی هێرشەكانی (24) كاتژمێری رابردوی سوپای ئیسرائیل بۆسەر كەرتی غەززە (100) قوربانی لێكەوتەوە و وەزارەتی تەندروستی غەززەش ئاماری قوربانیان لە (7ـی تشرینی یەكەمی 2023) تا ئەمڕۆ ئاشكرا دەكات.


هەواڵ: (KNNC)


وەزارەتی تەندروستی فەڵەستین لە کەرتی غەززە بڵاویكردەوە؛ لەئەنجامی هێرشە بەردەوامەكەكانی سوپای ئیسرائیل بۆ سەر كەرتی غەززە و بەئامانجگرتنی هاوڵاتیانی مەدەنی لە (24) كاتژمێری رابردودا (100) قوربانی لێكەوتوەتەوە كە (19) گیان لەدەستدان و برینداربونی (81) كەسی دیكە تۆماركراون.


راشیگەیاندوە: لە دوای دەستپێكردنەوەی جەنگ و هێرشەكانی ئیسرائیل لە (18ـی ئاداری 2025)ـوە تا ئەمڕۆ ژمارەی قوربانییەكان بۆ دو هەزار و (720) گیان لە دەستدان و برینداربونی حەوت هەزار و (513) كەسی دیكە بەرزبوەتەوە.


وەزارەتی تەندروستی فەڵەستین ئاژماژەی بۆ ئەوەشكردوە، ژمارەی ئەو فەڵەستینییانەی لە (7ـی تشرینی یەكەمی 2023) تا ئێستا لە کەرتی غەززە گیانیان لەدەستداوە گەیشتوە بە (52) هەزار و (829) كەس، هەروەها (119) هەزار و (554) كەسی دیكەش برینداربون.