ترێنت ئەلێكسەندەر ئارنۆڵد بەشێوەیەكی فەرمی ماڵئاواییكردن و جیابونەوەی لەیانەی لیڤەرپوڵ راگەیاند.

هەواڵ:KNNC

گرێبەستەكەی ئارنۆڵد و لیڤەرپوڵ حوزەیرانی ئەمسال كۆتایی دێت، بەوەش بەگرێبەستی ئازاد و بێبەرامبەر پەیوەندی بەیانەی داهاتویەوە دەكات ، بەپێی سەرچاوەكانی هەواڵیش یاریزانە ئینگلیزیەكە لەگەڵ یانەی ریاڵ مەدرید رێككەوتوە و بۆ ماوەی پێنج ساڵ گرێبەست لەگەڵ یانە ئیسپانیەكە واژۆدەكات.

ئارنۆڵد لەئەكادیمیای یانەی لیڤەرپولەوە و لەتەمەنی شەش ساڵییەوە دەستی پێكردوە و ماوەی 20 ساڵە لەگەڵ یانە ئینگلیزیەكە بەردەوامە.

ئارنۆڵد لەگەڵ لیڤەرپوڵ بەشداری لە 352 یاریدا كردوە و جگە لە 23 گۆڵ 92 ئاسیستیشی كردوە و لەگەڵیدا چەندین نازناوی بەدەستهێناوە كە گرنگترینیان نازناوەكانی پرێمەرلیگ و چامپیۆنس لیگە.

ئارنۆڵد لەنامەی ماڵئاواییەكەیدا كە نیوەڕۆی ئەمرۆ بڵاویكردەوە نوسیویەتی: ئەم یانەیە یانەی ژیانمە ماوەی 20 ساڵە هەمو جیهانی من لیڤەرپوڵە.

راشیگەیاندوە لەئەكادیمیاوە تا ئەمرۆ خۆشەویستی و پاڵپشتی زۆری لە یانەیەكەوە بەدەستهێناوەو تامردن شانازییان پێوەدەكات و خۆی بەقەرزارباریان دەزانێت.