لیژنەیەکى تایبەتى هەرێم و بەغداد، سەرقاڵى چارەسەرکردنى کێشەکانى خانەنشینان و پرسى هاوتاکردنى موچەکانیانن، بەپێی ئەو زانیارییانەش دەست کەى ئێن ئێن کەوتوە، بەشێک لە خانەنشینان دەبێت سەدا سێی موچەکانیان بگەڕێننەوە بۆ حکومەت و بەشێکى دیکەیشیان بۆ لەمەودوا لەگەڵ خانەنشینبونیان 18 موچە وەردەگرن.

هەواڵ:KNNC

ئەندامێکى شاندى دارایی هەرێم لە بەغداد بە کەى ئێن ئێن-ى راگەیاند؛ ئەو شاندەى ماوەى دوو هەفتەیە لە بەغدادە کراون بە دوو لیژنە، یەکێکیان تایبەتە بە کێشەى موچەى فەرمانبەرانى هەرێم و ئەوى دیکەیان تایبەتە بە کێشەى خانەنشینان و هاوتاکردنى موچەکانیان.

ئەوەى بۆ کەى ئێن ئێن ئاشکرا کرد کە یەکێک لە بڕیارەکان ئەوەیە کە کۆنوسێک هەیە و هەردولا لەسەرى رێککەوتون، ئەویش گەڕاندنەوەى 3%ـى موچەى بەشێک لە خانەنشینانە بۆ حکومەت، ئەویش ئەو خانەنشینانە دەگرێتەوە کە لە ساڵى 2014 تا ساڵى 2024 خانەشنین بون.



کێشەکە ئەوەیە کە لە رابردودا حکومەتى هەرێمى کوردستان 7%ـى موچەى ئەو فەرمانبەرانەى بۆ سندوقى خانەنشینى بڕیوە، لەکاتێکدا لە عێراق ئەو بڕە 10% بوە، بۆیە دەبێت ئەوانەى لە ساڵى 2014 تا 2024 خانەنشین بون مانگانە 3%ـى موچەکانیان بدەنەوە بە حکومەت کە بەمجۆرە دەکات:

ئەگەر خانەنشینێک موچەکەى بڕى 500 هەزار دینار بێت؛ بە لێبڕینى 3% مانگى 15 هەزار لە موچەکەى دەبڕدرێت و ئەمەش لە ساڵەکەدا دەکاتە 180 هەزار دینار کە پێویستە ئەو خانەنشینە بیگەڕێنێتەوە بۆ حکومەت و لە ماوەى 10 ساڵدا دەکاتە ملیۆنێک و 800 هەزار دینار.

بەشێکى دیکە لەو زانیارییانەى ئەندامەکەى لیژنەى دارایی بە کەى ئێن ئێن،ى وتوە ئەوەیە کە بۆ لەمەودوا، ئیکرامى خانەنشینان بۆ ئەو کەسانەى لە بەروارى 31/12/2024 لەکارترازانى بۆ کرابێت بەمشێوەیە موچە وەردەگرێت:

موالیدەکانى (1962- 1963 – 1964) 12 مانگ بە تێکڕا موچە وەردەگرن و شەش مانگیش بە موچەى بنەڕەتى بۆیان دەکرێت کە بەمشێوەیە دەبێت:

ئەگەر کەسێک 599 هەزار موچەى بنەڕەتى هەبێت بۆ 6 مانگەکە سێ ملیۆن و 594 هەزار دینار وەردەرگرێت و 12 مانگیشى لێکدانى تێکڕاى موچەکەى دەکرێت ئەگەر کەسەکە 996 هەزارى هەبێت لێکدانى 12 مانگ دەکرێت و دەکاتە 11 ملیۆن و 952 هەزار، واتا لەمەودوا هەر خانەنشینێک 18 موچە وەردەگرێت لەجێی شەش موچە.

واتا لەمەودوا خانەنشینان ئیکرامییەکەیان لەجێی ئەوەى شەش مانگ و موچەى بنەڕەتى بێت، شەش مانگى بنەڕەتى و 12ـى تێکڕاى موچە دەبێت، واتا 18 موچە وەردەگرێت,.

سلێمانى/ بڕیار نامیق