وەزیرى ناوخۆى هەرێم دەڵێت: پرسى موچە لە یاساییەوە بوەتە سیاسیی و چیتر بیانوەکانى بەغداد لەوبارەیەوە قبوڵکراو نین، لەبارەى ئۆتۆمبێلە بێسەرەتاکانیشەوە دەڵێت: نابێت هاوڵاتییان زەرەرمەند بن.

هەواڵ:KNNC

رێبەر ئەحمەد، وەزیرى ناوخۆى هەرێم لە کۆنگرەیەکى رۆژنامەوانیدا دەربارەى کردنەوەی تاقیگەیەکى تایبەت رایگەیاند؛ پرسى نەناردنى موچە لە ئێستادا لە پرسە یاساییەکان دەرچوە و کراوەتە سیاسیی و بەغداد بڕیارى هەڵە دەدات.

وتیشى: چیتر بیانوەکانى بەغداد بۆ نەناردنى موچە قبوڵکراو نین و هیوادارین بە زوترین کات موچە بنێردرێت.

لەبارەى رۆڵى هەرێمى کوردستانەوە وەزیرى ناوخۆ ئاماژەى بۆ ئەوەکرد کە هەرێم تەواوى داتاکانى رادەستى بەغداد کردوە و هیچ نەماوەتەو بیکات و بەردوامیش بەرپرسانى هەرێم و بەغداد بۆ چارەسەرى پرسى موچە لەسەر هێڵن.

لەبارەى بڕیارى دەستبەسەرداگرتنى ئۆتۆمبێلە بێسەرەتاکانیشەوە رێبەر ئەحمەد وتى: ئەو ئۆتۆمبێلانە مەرجى سەلامەتیان تێدا نییە و نایاسایین، بەڵام چارەسەرکردنیان دەبێت بەجۆرێک بێت هاوڵاتییان تێیدا زەرەرمەند نەبن.