هێزەکانی سوریای دیموکرات لە پێشڕەویدان و توانیویانە چەندین ناوچە لە دەوروبەری شاری حەلەب کۆنترۆڵ بکە، لەنێویشیدا وێستگەیەکی سەرچاوەى گرنگی دابینکردنی ئاو بۆ شارەکە.

هەواڵ:KNNC

روانگەی سوریی بۆ مافەکانی مرۆڤ بڵاویکردەوە: هێزەکانی سوریاى دیموکرات -هەسەدە- دوای روبەڕوبونەوەیان لەگەڵ گروپە چەکدارەکانی سەر بە تورکیا، توانیویانە پێشڕەوی بکەن و دەست بەسەر چەندین ناوچە لەدەوروبەری حەلەبدا بگرن.

ئاماژە بۆ ئەوەشکراوە کە جگە لە دەستگرتن بەسەر چەندین ناوچەدا، توانیویانە کۆنترۆڵى وێستگەی ئاوی ( باپیری) بکەن کە سەرچاوەیەکی گرنگی دابینکردنی ئاوی خواردنەوەیە بۆ حەلەب.

ئەوەش هاتوە، هەسەدە دەستی بەسەر شارۆچکەی خەفسەدا گرتوە و لە هەوڵیشدان بۆ کۆنترۆڵکردنی فڕۆکەخانەی کوێرسی سەربازی و پاککردنەوەی حەوت گوند لە دەوروبەری پارێزگای دێرزور کە لەژێر دەسەڵاتی گروپەکانی سەر بەرژێمی سوریاو ئێراندا بون لەوانە گوندەکانی ساڵحییە، تابیە، خشام و مەرات و موزڵوم و حسێنیە.