وەزارەتى پلاندانانى هەرێمى کوردستان دەستپێکردنى قۆناغى کۆتایی پرۆسەى سەرژمێرى گشتى دانیشتوانى هەرێمى کوردستانى راگەیاند و داواش لەو هاوڵاتییانە دەکات کە لە قۆناغى دوەم گەڕابونەوە ناوچە دابڕێنراوەکان، لەم قۆناغەشدا بگەڕێنەوە و بەشدارى پرۆسەکە بکەن.

هەواڵ:KNNC

وەزارەتى پلاندانان لە راگەیەنراوەکەیدا دەڵێت:  ئەمڕۆ قۆناغی کۆتایی پرۆسەی سەرژمێری گشتیی دانیشتوانی هەرێمی کوردستان دەست پێدەکات کە بۆ ماوەى زیاتر لە دوو هەفتە بەردەوام دەبێت و بژمێرەکان لەم ماوەیەدا سەردانى گشت خێزانەکان دەکەنەوە بۆ وەرگرتنى وەڵامى 77 پرسیارەکە.

ئاماژە بۆ ئەوەکراوە کە ئەو پرسیارانەى لە هاوڵاتییان دەکرێت بارى دیموگرافی و کۆمەڵایەتی و ئابوری و پەروەردەی و تەندروستی و کار و بێکاری و نیشتەجێبون و کۆچ و هۆیەکانی گۆڕینی شوێنی نیشتەجێوون و زانیاری کارتی نیشتمانی و فۆرمی خۆراک  رۆژی لەدایک بون، ژمارەی ئەو کەسانەی مردون لەنێو خێزاندا و چەند پرسیارێکى دیکەیش دەگرێتەوە.

وەزارەتەکە داوا لە هاوڵاتییان دەکات کە هاوشێوەى قۆناغەکانى پێشو هاوکارى بژمێرەکان بکەن و پێویستیشە بۆ وەڵامى پرسیارەکان کەسێکى بەرپرسى خێزانەکە لەماڵ بێت.

لەبارەى ئەو هاوڵاتییانەى لە قۆناغى پێش کۆتایی لە ناوچەکانى دیکەى هەرێمى کوردستانەوە گەڕانەوە بۆ ناوچە دابڕێنراوەکان و ناوچەکانى خۆیان وەزارەتى پلاندانان جەخت دەکاتەوە کە پێویستە لەم قۆناغەش بگەڕێنەوە بۆئەوەى مافەکانیان نەفەوتێتیت و پرۆسەکەش بەشێوەیەکى دروست کۆتایی بێت.