هەرێمى کوردستان لەبەردەم شەپۆلێکى بارانى بەخوڕ و هەورەبروسکەدایە، شارەزایەکى کەشناسى لەگەڵ ئەوەى هۆشدارى دەدات بە شوانکار و جوتیارەکان، پێشبینیش دەکات لە هەندێک ناوچە چەند هێندەى پێویستى پەڵەدان باران ببارێت.

هەواڵ:KNNC

محەمەد کەمال، شارەزاى کەشناسى پێشبینى کەشوهەواى چەند رۆژى داهاتوى بۆ کەى ئێن ئێن کرد و رایگەیاند؛ لە هەولێر و کەرکوک و باشورى گەرمیان لە ئێستادا باران بارین دەستى پێکردوە و هەورێکى بەهێز و چالاکیش بەرەو ناوچەکانى هەرێمى کوردستان بەڕێوەیە و پێشبینى دەکەین لە چەند کاتژمێرى داهاتو کەرکوک و هەولێر و ئیدارەى گەرمیان و سلێمانى هەڵەبجە بگرێتەوە.

وتى: لە سبەینێوە چالاکى دەریاى سور لەگەڵ کیشوەربڕ دەگاتە هەرێمى کوردستان و شەپۆلى یەک لەدواى یەکى زەبەلاح بە هەورەبروسکەوە دروست دەبێت و لە سەرجەم ناوچەکانى هەرێمى کوردستان تاوە بارانى بەهێزە و لافاو لە چەم و دۆڵە نزمەکان و بەرزبونەوەى ئاستى ئاو لە سەنتەرى شارەکان دەبێت.

ئەوەشى خستەڕو کە چەقى کاریگەریی بەهێزى ئەم شەپۆلە دەکەوێتە سبەینێ یەکشەممە و هەندێک کاتى رۆژى دوشەممە پێشبینیش دەکات شەپۆلەکە رۆژى چوارشەممە کۆتایی بێت.

محەمەد کەمال هۆشداریدا و وتى: سبەینێ جوتیاران بەهیچ شێوەیەک ناوچەى نزم و دۆڵ و چەمەکان بەکارنەهێنن، چونکە ئەگەرى هاتنى لافاو هەیە و بە ماوەیەکى کەم بارانێکى زۆر دەبارێت، شوانکارەکانیش بە هیچ شێوەیەک شوێنە بەرزەکان بەکارنەهێنن، چونکە هەورەبروسکەى توند دەبێت و زۆرینەیان بارگاوین.

لەبارەى پێشبینى بڕى باران بارینیشەوە ئەو شارەزاى کەشناسییە وتى: بە گشتى پێشبینى نێوان 60 بۆ 70 ملیمەتر باران دەکرێت، بەڵام لە سلێمانى و کەرکوک و هەولێر چاوەڕێ دەکەین 100 ملیم باران ببارێت بەمەش رێژەکە لە پەڵە دەردەچێت.

رەونیشیکردەوە کە پەڵە پێویستى بە بارانى نەرم و بەردەوامە، بەڵام ئەم شەپۆلە ناو بەناوە بۆیە رەنگە نیمچە پەڵە بدات و لە ناوچە کوێستانییەکانیش ئەگەرى پەڵە هەیە.