روسیا لەگەڵ حەوت وڵاتی دیکە گەورەترین ڕێکەوتنی ئاڵوگۆری دیلی ئەنجامدا و تێدا 26 کەس ئاڵوگۆڕکران سەرۆکی ئەمریکاش دەڵێت: ئەمە گەورەترین رێکەوتنە لە دوای جەنگی ساردەوە ئەنجامدەدرێت.

هەواڵ:KNNC

بە نێوەندگیری تورکیا، وڵاتی ڕوسیا لەگەڵ حەوت وڵاتەی دیکە کە دیاترینیان ئەمریکا و ئەڵمانیا بون ڕێکەوتنێکی ئاڵوگۆڕی دیل ئەنجامدرا کە 16 کەسیان لە لایەن ڕوسیا ئازاد کراون و 10 کەسی دیکەش لە لایەنی وڵاتەکانی دیکەوە ئازاد کران. 

دیلەکان بە حەوت فڕۆکە گواسراونەتەوە، 13 کەسیان ڕەوانەی ئەڵمانیا کراون و سێ کەسی دیکەش رویان لە ئەمریکا کردوە، هەر یەک لە ولاتانی پۆڵەندا و سلۆڤینیا و نەرویج و بێلاڕوسیا بەشداربون لە رێککەوتنەکەدا.

لەو 16 دیلەی ڕوسیا ئازادی کردون، سێ کەسیان هاوڵاتی ئەمریکی بون و پێنجی دیکەشیان هاوڵاتی ئەڵمانی و حەوتی دیکەش سیاسی ڕوسی بون، کەسەکەی دیکەش باسی لێوەنەکراوە. 

لە دوای ئازادکردنی دیلەکانیش هەریەکە لە ڤلادیمیر پوتین، سەرۆکی ڕوسیا و جۆ بایدن، سەرۆکی ئەمریکا پێشوازیان لە دیلەکانیان کرد، بایدن ڕایگەیاند، لە دوای جەنگی ساردەوە ئەمە گەورەترین ڕێککەوتنە ئەنجام درابێت.