عەلى خامنەیی، رێبەرى باڵاى کۆمارى ئیسلامى ئێران لەبارەى کوشتنى هەنیە لە تارانى پایتەخت دەڵێت: رژێمى سەهیۆنى تاوانبار و تیرۆرست میوانەکەمانى لەناو ماڵەکەماندا شەهید کرد و خەمبارى کردین، بەڵام سزایەکى توندى بۆخۆى ئامادەکرد.

هەواڵ:KNNC

لە بەیاننامەکەدا خامنەیی دەڵێت: شەهید هەنیە چەندین ساڵى لە تەمەنى بەنرخى خۆى لە مەیدانى بەرگریی شەرەفمەندیدا بەسەربرد و ئامادەبو بۆ شەهیدبون، لەو پێناوەدا قوربانیدا بە منداڵەکانى و گەلەکەى، نەدەترسا شەهید ببێت لەپێناو خودا و رزگارکردنى بەندەکانى خودا.

دەڵێت: "ئێمە بە ئەرکى خۆمانى دەزانین تۆڵەى خوێنى بکەینەوە لەم روداوە تاڵ و قورسەى لە خاکى کۆمارى ئیسلامى ئێران رویدا".

هەروەک سەرەخۆشى خۆیشى رادەگەیەنێت و دەڵێت:"سەرەخۆشى لە ئوممەتى ئیسلام و سەنگەرى بەرگریی لە گەلى فەڵەستن دەکەم و داوا لە خودا دەکەم بە رەحمەتى خۆى دایبپۆشێت".