ئەنجومەنی قەزای کفری بزوتنەوەی گۆڕان لە ساڵیادی مانگرتنە جەماوەرییەکەی تەمموزی ساڵی (2023) دەڵێت: شێلگیرتر و ڕژد دەبین بۆ ئەوەی تەواوی بەڵینەکان جێ بەجێ بکرێن و ئەم شارەی ئێمەش هاوتای شارەکانی تری کوردستان خزمەتی زیاتر بکرێت، جەختیش دەکەنەوە لەوەی کفری سەلماندی شارێکی رۆشنبیر و هەقبێژە ستەم و نادادی قبوڵ ناکات و بەئارامی و تێکنەدانی تەونی کۆمەڵایەتی مافەکانی بەدەست دێنێت.


دەقی راگەیەندراوەکە

ڕاگەیاندراوی مەکۆی کفری بزوتنەوەی گۆڕان لەساڵیادی مانگرتنە جەماوەرییەکەی تەمموزی ٢٠٢٣

هاوشارییانی کفری خۆشەویست

گەرمیانیانیە تێکۆشەرەکان

ئەمڕۆ ١٠ ی تەمموز ساڵیادی یەکەمی مانگرتنە جەماوەرییە سی و چوار ڕۆژییەکەی شاری کفریە ، کە ڕێکخراوی پاڵپشتی کفری و گەنجە بوێرەکان و زۆرینەی لایەنە سیاسیەکان و خەڵکی بەشمەینەتی شارەکەمان لە دژی نەبونی خزمەتگوزاری سەرەتایی و پرۆژە و هەلی کار و ئاوەدانکردنەوەی پیرە شارە دێرینەکەی کوردستان ، بەو گەرما تاقەت پڕۆکێنە بەدەنگی زوڵاڵ داوای کار و پرۆژەمان کرد بۆ شارەکەمان ، لەدوای ٣٤ رۆژ لەمانگرتن کە خەباتێکی مۆدێرینی مەدەنی بو سەلماندمان هەمومان بەیەکەوە ئامانجمان تەنها خزمەت کردنی ئەم شەرە بێناز و فەرامۆشکراوەی باشوری کوردستانە کە مەترسی چۆڵبون و  گۆڕینی دیمۆگرافیای لەسەر بو، کۆڕایی هەمومان و تەنها لە پێناوی شارەکەمان وایکرد کە حکومەت و هێزەسیاسیەکان لەسەر ئاستی باڵا بێنە سەر هێڵ بۆ ئەوەی ئاوڕێک لەم قەزا هەرە دێرینەی کوردستان بدەنەوە ، هەرلەسەرەتای ئەم مانگرتنە جەماوەرییە ئێمە لە بزوتنەوەی گۆڕان و تیمە وزاریەکەمان لە حکومەتی هەرێم و حکومەتی خۆجێی دەستپێشخەر بوین بۆ هاتنە دەمەوەی مانگرتوان و لەیەک هەفتە سێ وەزیری تیمەکەمان لەحکومەت سەردانی خێوەتی مانگرتوانیان کرد بە هەگبەیەک لە پرۆژە و ئاوردانەوە لە کفری و دواتریش سەرۆکی حکومەت و جێگرەکەی بەدەم داواکاری مانگرتوانەوە هاتن و بەشێک لەداواکارییەکانی مانگرتوان جێ بەجێ کران کە دەستکەوتی مەعنەوی و وەگڕخستنەوەی پرۆژە و هێنانی سەرۆکایەتی زانکۆ و قیرتاوکردنی ڕیگاوبانەکان و هتد دەگرێتەوە، ئێمە لەم ساڵیادەدا شێلگیرتر و ڕژد دەبین بۆ ئەوەی تەواوی بەڵینەکان جێ بەجێ بکرێن و ئەم شارەی ئێمەش هاوتای شارەکانی تری کوردستان خزمەتی زیاتر بکرێت . لێرەوە سوپاسی هەمو ئەوانە ئەکەین کە هاوکار و پشتیوانی مانگرتوان بون و دەستی ماندوبنی هەمو مانگرتوێک و گەنجەکان و هاوڵاتیانی شارەکەمان ئەگوشین کە پێکەوە هەمومان خەمی شار کۆیکردینەوە و لەئەنجامدا کفری سەلماندی شارێکی رۆشنبیر و هەقبێژە ستەم و نادادی قبوڵ ناکات و بەئارامی و تێکنەدانی تەونی کۆمەڵایەتی مافەکانی بەدەست دێنێت

لەگەڵ ڕێزدا

بزوتنەوەی گۆڕان
ئەنجومەنی قەزای کفری
١٠ ی تەمموزی ٢٠٢٤