وەزارەتی دارایی و ئابوری هەرێم خشتەی دابەشکردنی موچەی بۆ مانگی حوزەیران بڵاوکردەوە و بەپێی خشتەکەش موچەی سەرجەم وەزارەت و دەستەکان لە ماوەی دوو رۆژدا دابەشدەکرێت.

هەواڵ:KNNC

وەزارەتی دارایی و ئابوری حکومەتی هەرێمی کوردستان رایگەیاند، رۆژی چوارشەممە (10/7/2024) دەست بە دابەشکردنی موچەی مانگی حوزەیرانی فەرمانبەران دەکەن.

بەپێی خشتەکەی وەزارەتی دارایی و ئابوری، دابەشکردنی موچە بە وەزارەتی تەندروستی دەستپێدەکات و رۆژی پێنجشەممە بە سەرۆکایەتی ئەنجومەنی وەزیران کۆتاییدێت.

وەزارەتی دارایی راشیگەیاندوە، بەهۆی ئەوەی تەمویلەکانیان لە بەغدادەوە نەهاتوە کە بڕەکەی 18 ملیار دینارە، خشتەی دابەشکردنی موچە وەزارەتی کارەبا و سەرۆکایەتی پەرلەمانی تێدا نییە، بۆ چارەسەرکردنی ئەو گرفتەش لەگەڵ وەزارەتی دارایی عێراق لەسەر ‌هێڵن.

ئەوەلەکاتێکدایە، بەهۆی بونی گرفت لە لیستی ناوەکانیان تا ئێستا وەزارەتی دارایی عێراق موچەی مانگەکانی پێنج و شەش-ی هێزە ئەمنییەکانی هەرێمی کوردستانی خەرج نەکردوە.