عێراق؛ ئەیاد عەلاوی هۆشداری دەدات

KNN : Kurdish News Network
05:58 - 03/07/2024
عێراق
+
-

سەرۆکی هاوپەیمانی نیشتمانی، هۆشداری لە توندبونەوەی ناكۆكییەكانی ناوخۆی و نێوان پێكهاتەكانی عێراق دەدات و داوا دەكات سەرجەم هێزە سیاسییەکان بەئاڕاستەی چارەسەركردنی كێشەكان گفتوگۆیەك بۆ ئاشتەوایی نیشتیمانی رێكبخەن.

هەواڵ: (KNNC)


ئەیاد عەلاوی، سەرۆکی هاوپەیمانی نیشتمانی بەمیدیا عێراقییەكانی راگەیاندوە: لەپێناو ئایندەیەكی باشتر بۆ عێراق و عێراقییەكان كە بەدرێژای ساڵانی رابردو خەڵك و هێزە ئۆپۆزسیۆنەكان هەوڵیان داوە كە دوای روخانی رژێمی پێشو بە هەر سێ پێكهاتە سەرەكییەكە (شیعە، سوننە و كورد) و كەمە نەتەوە و ئاینە جیاوازەكانی دیكەوە عێراقێكی دیموكراسی و گەیشتن بە دەوڵەتێكی هاوڵاتیبون بنیادبنێن، بەڵام بارودۆخی ناوماڵی شیعە، سوننە و كوردیش ئاڵۆزە و نەتوانراوە بەم ئامانجە بگات.

 

وتیشی: بەردەوامی ئەم بارودۆخە، ناكۆكییە ناوخۆییەكان زیاتر دەكات، كە ئەوەش جێگەی نیگەرانییە و مەترسی گەورە دروست دەكات و ئەگەری تەقینەوەی بارودۆخەكە و دابەشبونی عێراقی بەدواوەیە.

 

ئەیاد عەلاوی داوا دەكات؛ كە هێزە سیاسییە نیشتمانییەکانی وڵات، کۆنفرانسی دیالۆگی نیشتمانی سازبكەن و  نوێنەری هەمو هێزە سیاسییەکان، فیدراسیۆنەکان، شێخەکانی عەشایر و نوێنەرانی گەل بەشداری تێدا بكەن و گفتوگۆکردن لەسەر پرسە بنەڕەتییەکان و رەوتی پڕۆسەی سیاسی بكەن بۆ گەیشتن بە ئاشتەوایی راستەقینەی نیشتمانی.

 

سەرۆکی هاوپەیمانی نیشتمانی راشیگەیاندوە: بۆ كەمكردنەوە ئەو ململانێ توندانە و كەمكردنەوەی گرژی و ئاڵۆزییەكان كە ناوچەكە بەدەستییەوە دەناڵێنێت، دڵنیام بەستنی كۆنگرەیەكی نیشتیمانی عێراق دەگەڕێنێتەوە بۆ پێگە نێودەوڵەتییەكەی خۆی و رۆڵی سەرەكی دەبینێت لە بەدەستخستنی ئاسایش و سەقامگیری ناوچەكە.

128 جار خوێندراوەتەوە