ئەنجومەنى وەزیران کۆبونەوەى ئاسایی خۆى بەڕێوەدەبات، گرنگترین تەوەرەکانى کۆبونەوەکەش تایبەتە بە پرسى هاوتاکردنى موچەى خانەنشینان لەگەڵ حکومەتى فیدراڵ و موچەى مانگەکانى 5 و 6ـى موچەخۆران و هێزە ئەمنییەکان.


هەواڵ:KNNC

بەپێی تەوەرەکانى کۆبونەوەى ئەنجومەنى وەزیران، لە تەوەرى یەکەمدا لەلایەن وەزیرى دارایی و ئابورییەوە بابەتى هاوتاکردنى موچەى خانەنشینانى هەرێم لەگەل هاوتاکردنیان لە حکومەتى فیدراڵ بەپێی یاساى خانەنشینى یەکگرتو دەخرێتەڕو.

لە تەوەرى دوەمى کۆبونەوەکەدا دەرئەنجامى کۆبونەوەى هاوبەشى هەردو حکومەتى فیدراڵ و هەرێم تایبەت بە دەروازە سنورییەکان کە سەرەتاى ئەم مانگە بەڕێوەچو لەلایەن وەزیرانى ناوخۆ و داراییەوە دەخرێتەڕو.

تەوەرى سێیەمى کۆبونەوەکە وەزیرى دارایی بەدواداچونى بابەتى موچەى مانگى شەشى موچەخۆرانى هەرێم و موچەى مانگەکانى 5 و 6ـى هێزە ئەمنییەکان دەخرێتەڕو، باسیش لە دواپێشهاتەکانى بابەتى وردبینى و پێداچونەوەى لیستى موچەى هێزەکانى پێشمەرگە لەلایەن تیمى هاوبەشى هەردو دیوانى چاودێرى دارایی هەرێم و حکومەتى فیدراڵ باسى لێوە دەکرێت.