ئێران مانگی دەستکرد رەوانەی بۆشایی ئاسمان دەکات

KNN : Kurdish News Network
03:29 - 09/08/2022
جیهان

بەرەبەیانی ئەمڕۆ ئێران مانگی دەستکردنی خیامی لە رێگەی وێستگەی گەردونی بایکونور لە کازاخستان رەوانەی بۆشایی ئاسمان کرد.

عیسا زار عبور، وەزیری پەیوەندی و تەکنەلۆجیای زانیاری ئێران رایگەیاند: وڵاتەکەمان مانگی دەستکردنی خیامی رەوانەی بۆشایی ئاسمان کردوە و لە دوری 500 کیلۆمەتر لە زەوییەوە جێگیر دەکرێت.

عبور ئاماژەی بەوەشکردوە، رەوانەکردنی ئەو مانگە دەستکردە هەنگاوێکی گەورەیە بۆ دەستکەوتنی زانیاری گەردونی بە ئاسانی و دەتواندرێت لە بەدەستخستنی وێنەی ئاست بەرز لە بواری گەردون و ژینگە و کشتوکاڵیشدا بەکاربهێندرێت.

عبور لە بارەی ئەوەی کێ پاڵپشتی ئێران بوە لەو کارەدا دەڵێت: روسیا هاوکاری ئێرانی کردوە لە رەوانەکردنی ئەو موشەکەدا و ئەمە سەرەتای هاریکاری ستراتیجی نێوان تاران و مۆسکۆدا لە بواری گەردونناسیدا و ئەو پەیوەندییە بەردەوام دەبێت.

لەبارەی تایبەتمەندی مانگە دەستکردەکەوە وەزیری پەیوەندییەکانی ئێران ئاشکرایکرد: خیام کێشەکەی 600 کیلۆگرامەوە و لە دوری 500 کیلۆمەتر لە زەوییەوە جێگیر دەکرێت.

باسی لەوەشکردوە، کار لەسەر ئەوە دەکەن لە داهاتودا دەیانەوێت وێستگەیەکی گەردونناسی لەناو ئێران دابمەزرێنن و لەوێوە رەوانەی بۆشایی ئاسمانی بکەن.

94 جار خوێندراوەتەوە