وەزارەتی پێشمەرگە راگەیەنراوێکی لەبارەی گرژییەکانی دوێنێ شەوی سنوی دهۆك بڵاوکردەوە. 

ئەمڕۆ هەیینی وەزارەتی پێشمەرگە رایگەیاند: دوێنێ پێنج شەممە 2022/5/26 لە دوو روداوی جیادا، بە چەکی قەناس هێرش كرایە‌ سەر هێزەکانی پێشمەرگە. 

 

باسی لەوەشکردوە، لە روداوی یەکەمدا بەچەکی قەناس هێرش کراوەتەسەر سەنگەرێکی لیوای چواری پیادە لە گوندی کانی ماسی و پێشمەرگەیەک بە ناوی( ن.ع/ محمد فازل محمد) بریندار بوو.

 

دەشڵێت: لە روداوی دوەمدا، لەکاتی هاوەن باران کردنی ناوچەکانی بامەڕنێ گولە هاوەنێک لەگوندی ئەرەدنا لە ناوچەی بامەڕنێ، لە قەزای ئامێدی پارێزگای دهۆک، کەوتەوەتە خوارەوە و لە ئەنجامدا دو هاوڵاتی بە ناوەکانی (یوسف کۆڤان حاجی، ئەڤەند هۆشیار)، شەهید بون و دو هاوڵاتی دیکەش بریندار بون.

 

 

وەزارەتی پێشمەرگە راشیگەیاند: ئەم روداوانە لەکاتێکدا بون، کە هێزەکانی پێشمەرگە لەسەنگەرەکانی خۆیاندا بون و هێزەکانی پێشمەرگە و خەڵکی کوردستان نیگە‌رانن لە‌و كردە‌وانە‌ دەبێت هەموو لایەک تێبگەن کە پاراستنی ئاسایش و ئارامی خەڵک و خاکی کوردستان ئەرکی لەپێشینەی هێزەکانی پێشمەرگەیە وسازش ناكە‌ن لە‌جێبە‌جێ كردنی ئە‌و ئەر‌كە‌یان.

 

 

وتیشی: هیوادارین ململانێکانی سەر سنورەکان چیتر پەل نەهاوێژێت بۆ سەر هێزەکانی پێشمەرگە.

 

 

دەقی راگەیەنراوی وەزارەتی پێشمەرگە: 

*راگەیە‌ندراوێک لە شانەی راگەیاندن و هۆشیاری پێشمەرگەوە*
دوێنێ پێنج شەممە ٢٦ی ئایاری ٢٠٢٢، لە دوو روداوی جیادا، بە چەکی قەناس هێرش كرایە‌ سەر هێزەکانی پێشمەرگە و بەهاوەن گوندەکانی ناوچەکە بۆردوومان كرا، بەم شێوەیە:
یەکەم: بەچەکی قەناس هێرش کراوەتە سەر سەنگەرێکی لیوای چواری پیادە لە گوندی کانی ماسی و پێشمەرگەیەک بە ناوی( ن.ع/ محمد فازل محمد) بریندار بوو.
دووەم: لەکاتی هاوەن باران کردنی ناوچەکانی بامەڕنێ گولە هاوەنێک لەگوندی ئەرەدنا لە ناوچەی بامەڕنێ، لە قەزای ئامێدی پارێزگای دهۆک، کەوتۆتە خوارێ، لە ئەنجامدا، دوو هاوڵاتی بە ناوەکانی (یوسف کۆڤان حاجی، ئەڤەند هۆشیار)، شەهید بوون و دوو هاوڵاتیش بریندار بوون.
ئەم روداوانە لەکاتێکدا بوون، کە هێزەکانی پێشمەرگە لەسەنگەرەکانی خۆیاندا بوون،
هەروەها بەشێک لە گوندەکانی عەشیرەتی نێروەیی لە ئاهەنگێکی ناوچەییدا بوون لە گوندی ئەرەدنا، سەربە قەزای ئامێدی.
ئێمە لە وەزارەتی پێشمەرگە رایدەگەیەنین کە؛ هێزەکانی پێشمەرگە و خەڵکی کوردستان نیگە‌رانن لە‌و كردە‌وانە‌و دەبێت هەموو لایەک تێبگەن کە؛ پاراستنی ئاسایش و ئارامی خەڵک و خاکی کوردستان ئەرکی لەپێشینەی هێزەکانی پێشمەرگەیە وسازش ناكە‌ن لە‌جێبە‌جێ كردنی ئە‌و ئەر‌كە‌یان.
هیوادارین ململانێکانی سەرسنوورەکان چیتر پەل نەهاوێژێت بۆ سەر هێزەکانی پێشمەرگە و پەکەکەش لەو ناوچەیە هەوڵ نەدەن ئارامی و ئاشتەوایی هێزەکانی پێشمەرگە بقۆزنەوە. چونکە رێگە نادرێت چیتر لەم ناوچانەدا، ئاسایش و ئارامی خەڵک تێک بچێت و گیانی هاوڵاتیان و پێشمەرگە بکەوێتە مەترسییەوە.
شانەی راگەیاندن و هۆشیاری پێشمەرگە
٢٦ی ئایاری ٢٠٢٢

527 جار خوێندراوەتەوە