یەکێتى داوا دەکات حکومەتى هەرێم کونسوڵى تورکیا بانگێشت بکات و رونکردنەوە بدات

KNN : Kurdish News Network
05:28 - 21/05/2022
کوردستان

یەکێتى نیشتمانى کوردستان، لەسەر بۆردومانى فڕۆکەکانى تورکیا لە سنورى ناحیەى ئاغجەلەر  و کامپى مەخمور، راگەیەندراوێکى بڵاوکردەوە و داوا دەکات، حکومەتى هەرێم بانگێشتى کونسوڵى تورکیا بکات و رونکردنەوەى لێوەربگرێت.

لە راگەیەنراوەکەى یەکێتی- دا هاتووە، به‌نیگه‌رانییه‌كی قوڵه‌وه‌ له‌و پێشھاته‌ ئه‌منی و سنوربه‌زاندنه‌ ده‌ڕوانین و ئیدانه‌ی بۆردومانی فڕۆكه‌كانی توركیا بۆ سنوری ناحیه‌ی ئاغجه‌له‌ری سه‌ر به‌ قه‌زای چه‌مچه‌ماڵ و كه‌مپی ئاواره‌كانی مه‌خمور ده‌كه‌ین كه‌ شه‌هیدبونی چوار هاووڵاتیی مه‌ده‌نی و هه‌شت برینداری لێكه‌وته‌وه‌.

‏‎دەشڵێت: وێڕای ده‌ربڕینی پرسه‌ و سه‌ره‌خۆشیمان بۆ كه‌سوكار و خانه‌واده‌ به‌ڕێزه‌كه‌یان، ده‌ستبه‌جێ داوای راگرتنی ئه‌م ھێرشانه‌ ده‌كه‌ین و داوا له‌ حكومه‌تی عێراق ده‌كه‌ین كه‌ ئه‌ركی ده‌ستوریی و نیشتمانیی خۆی له‌ پاراستنی خاك و ئاسمانی عێراق به‌ كوردستانیشه‌وه‌ رابپه‌ڕێنێت و له‌ رێگه‌ی كه‌ناڵه‌ دیبلۆماسییه‌كانه‌وه‌ حكومه‌تی توركیا له‌م پێشێلكارییه‌ ئاگاداربكاته‌وه‌.

یەکێتى نیشتمانى کوردستان، داوا لە حكومه‌تی ھه‌رێمیش دەکات، له‌سه‌ر ئه‌م روداوه‌ بانگهێشتی كونسوڵی توركیا له‌ ھه‌رێم بكات و رونكردنه‌وه‌ی لێوەربگیرێت.

لە راگەیەندراوەکەدا، یەکێتى جەختى لەوە کردۆتەوە،‌ ھیچ بیانوویه‌ك نییه‌ به‌ھۆی سنوربه‌زاندنه‌وه‌ خه‌ڵكی مه‌ده‌نی له‌ روی گیانیی و مادییه‌وه‌ زه‌ره‌رمه‌ندبن.

ئاماژەى بەوەشکردووە، "خوێنی ھاوڵاتییانمان پیرۆزه‌ و داواده‌كه‌ین پیرۆزییه‌كانمان بپارێزرێت و گه‌ڕانه‌وه‌ بۆ گفتوگۆ و لێكتێگه‌یشتن بكرێته‌ كلیلی چاره‌سه‌ری كێشه‌كان".

‏‎

239 جار خوێندراوەتەوە