هێرشەکەى سەر هەولێر... کاردانەوە سیاسیى و میدیاییەکان

KNN : Kurdish News Network
02:53 - 14/03/2022
ڕاپۆرت

لە تاریکی درەنگانى شەوى یەکشەممەدا کە زۆربەى دانیشتوانى پایتەخت لەخەودابون، دەنگى بەهێزى (12) موشەک رایچڵەکاندن، وەک دواتر ئاشکرابوو موشەکەکان لە ئێرانەوە ئاسمانی هەرێمیان بەزاند و پەیامێکی ئابوری و سیاسیی توندیان گەیاندە ماڵی ئەو کەسەی بەشێک لە دۆسێی نەوت و غازی هەرێم ئاراستە دەکات.

هێرشەکە، بەخێرایى کاردانەوەى ناوخۆیى و دەرەکى بەدواى خۆیدا هێنا، ئێران بە پاساوى بونى بنکەى ئیسرائیلى هێرشەکەیان ئەنجامداوە، نەیارانى ئێرانیش بەسەرەڕۆیى و پێشێلکارى وێناى روداوەکەیان کردووە.

لەکاردانەوەى هێرشەکەدا لەسەر ئاستى ناوخۆیى، زۆرێک لە سەرکردە و بڕیار بەدەستانى عێراق، هاوخەمى و پشتیوانیان بۆ هەولێر راگەیاند، لەوانە، موقتەدا سەدر و خەمیس خەنجەر و چەندین سەرکردەى دیکەى عێراق، هەر ئەمڕۆش، لە کاردانەوەى روداوەکە، کازمى گەیشتە هەولێر و دواى کۆبونەوەى لەگەڵ بەرپرسانى هەرێم سەردانى ئەو شوێنانەى کرد کە موشەکاکانى ئێران بە ئامانجى گرتوون.

لەسەر ئاستى ناوچەیش، وەزیری دەرەوەی سعودیە لە توتێکدا رایگەیاند،''هەموو شێوەیەکی توندوتیژی و تیرۆر رەتدەکەینەوە''.

وەزیری دەرەوەی ئیماڕاتیش بڵاویکردەوە، ئەو هێرشە بۆ تێکدانی ئاسایشی عێراقە و بەتوندی رەتى دەکەینەوە.

حکومەتی بەحرەینیش لە راگەیەنراوێکدا ئەو هێرشەی بە کردەوەیەکی تیرۆرستی ترسنۆکانە و بە پێشێلکردنی یاسا نێودەوڵەتییەکان ناوزەند کرد.

هەریەك لە کوێت و ئوردونیش بە توندی ئیدانەی ئەو هێرشەیان کرد.

لە بەرامبەری ئەو هێرشەدا وەزارەتى دەرەوەى عێراق بانگهێشتی باڵیۆزی ئێرانی لەبەغدا کردووە وەکو ناڕەزاییەك لەبەرامبەر ئەو هێرشانەوە و داوای روونکردنەوەی راشکاوانەی لێکردووە.

لەسەر ئاستى میدیایى، ئاژانسی شینخوای چینی بڵاویکردەوە، هێرشەکە بووتە هۆی داڕووخانی ماڵی خەڵکی سیڤیل و دڵەڕاوکێی بۆ دانیشتوانی هەولێر و دەوروبەری دروستکردووە.

رۆژنامەی نیویۆڕک تایمزى ئەمەریکیش بڵاویکردەوە،''هێرشەکە کاردانەوەی هێرشێکی ئیسرائیل بووە بۆ سەر کاروانێکی سوپای پاسداران لە هەفتەى رابردوو لە سوریا کە دوو چەکدارییان بەهۆی ئەو هێرشەوە گیانیان لەدەستدا''.

لاى خۆیەوە جەیك سولیڤان، راوێژکاری ئاسیشی نەتەوەیی کۆشکی سپی لە کۆنگرەیەکی رۆژنامەوانیدا رایگەیاند، ''ئەمەریکا کار لەسەر ئەوەدەکات توانای بەرگری عێراق بەرزبکاتەوە و ببێتە خاوەنی سیستمی بەرگری موشەکی''.

هەرچى کاردانەوەى ناتۆیە، لەڕێگەى بیر ئۆڵسنى نوێنەریان لە عێراق، نیگەرانی خۆی لەو هێرشە دەبڕی و بە کردەوەیەکی دوژمنکارانەی ناونا.

ناتۆ جەختى لەوەشکردۆتەوە، ئاسایشى عێراق بۆ هەموو وڵاتانی ناوچەکە گرنگە و پابەندن بە دابینکردنی ژینگەیەکی ئارام بۆ ئەم وڵاتە شکۆدارە.

فەڕەنساش کە لەسەر ئاستى سیاسیەتى نێودەوڵەتى ژمارەیەکى گەورەیە، ئیدانەی ئەو هێرشەی کرد و پێى وایە جۆرە کارانەى ئێران هەوڵەکان لاواز دەکات بۆ گەڕانەوەى بۆ رێکەوتنی ئەتۆمی.

ئەنجومەنی پەرلەمانی عێراق داوای لە حکومەت و هێزەکانی هاوپەیمانان و کۆمەڵگای نێودەوڵەتی کردووە "هەڵوێستی جدی و یەکلاکەرەوە بگرنەبەر و کۆتایی بەو دەستدرێژیانە بهێنن".

240 جار خوێندراوەتەوە