دادگای فیدراڵی رایدەگەیەنێت: بڕیارەکەیان بۆ راگرتنی کارەکانی سەرۆکایەتیی پەرلەمان بەشێوەیەکی کاتیی، کار ناکاتە سەر ماوە دەستوورییەکان بۆ هەڵبژاردنی سەرۆک کۆمار ‌و پێکهێنانی حکومەت.

ناوەندی راگەیاندنی دادگای فیدراڵی، بەیاننامەیەکی لە بارەی بڕیارەکەیان بە راگرتنی کاتیی کارەکانی سەرۆکایەتیی پەرلەمان، بڵاو کردەوە.

لە بەیاننامەکەی دادگای فیدراڵیدا هاتوە: بڕیارەکەیان لەبارەی ئەو سکاڵایانەی تایبەت بە یەکەم دانیشتنی پەرلەمانی عێراق تۆمار کرابوون، بڕیاری کۆتایی نین.

ئاماژەی لەوەش کردوە، بڕیارەکەیان، کار ناکاتە سەر ماوە دەستوورییەکان بۆ هەڵبژاردنی سەرۆک کۆمار ‌و پێکهێنانی حکومەت.

دادگای فیدراڵی، جەختیشی کردوەتەوە لەوەی، بڕیارەکە کاتێک کاریگەریی دەبێت، کە بڕیاری یەکلاکەرەوە بدرێت بە هەڵوەشاندنەوەی هەموو رێکارەکانی هەڵبژاردنی سەرۆکایەتیی پەرلەمان.

ئەوەش لەکاتێکدایە، هەر ئەمڕۆ دادگای فیدراڵی رایگەیاند: لەسەر سکاڵاکانی تایبەت بە یەکەم دانیشتنی پەرلەمانی عێراق ‌و هەڵبژاردنی دەستەی سەرۆکایەتیی پەرلەمان بریاریان داوە بە راگرتنی کارەکانی سەرۆکایەتیی پەرلەمان بە شێوەیەکی کاتیی.