دواى تێپەڕبونى (50) رۆژ بەسەر هەڵبژاردنى ئەنجومەنى نوێنەران، کۆمسیۆنی هەڵبژاردنەکانی عێراق ئەنجامی کۆتایی هەڵبژاردنی پێشوەختەی راگەیاند و ناوی سەرجەم کاندیدە دەرچووەکانی بڵاوکردەوە.

بەپێى راگەیەنراوى فەرمى و کۆتایى کۆمیسیۆن، لە هەڵبژاردنەکەى (10)ى ئۆکتۆبەرى لەکۆى (2021)، (22) ملیۆن و (116) هەزار و (368) دەنگدەر کە مافى دەنگدانیان هەبووە، نۆ ملیۆن و (629) هەزار و (601) کەس دەنگى داوە. واتا بەڕێژەى (44%).
ئاشکراشى کردووە، دەنگى راستەقینە (8) ملیۆن و (721) هەزار و (979) دەنگ بووە، کە دەکاتە (92%)ى ئەوانەى دەنگیانداوە و (721) هەزار و (979) دەنگیى پوچەڵیش تۆمارکراوە کە دەکاتە (8%)ى رێژەى بەژداریکردن.

ئەوەشى خستۆتەڕو، (52%)ى ئەوانەى دەنگیانداوە لە رەگەزى نێربون و (48%)ى دەنگدەرانیش لە رەگەزى مێ بوون.

ئەوەش لە کاتێکدایە، ئەمڕۆ (50) رۆژ بەسەر هەڵبژاردنى پێشوەختەى ئەنجومەنى نوێنەران تێدەپەڕێت کە بەیاسایەکى نوێ ئەنجامدرا و عێراقى بەسەر (83) بازنەى هەڵبژاردندا دابەشکردبوو.