ئێوارەى ئەمڕۆ شەممە، سێهەمین خولى پێشەنگاى نێودەوڵەتى سلێمانى بۆ کتێب کۆتایى پێهات و رۆژانەش نزیکەى (20) هەزار کەس سەردانى پێشەنگاکەیان کردووە و زیاتر لە (380) هەزار ناونیشانى جۆراوجۆریش لە پێشەنگاکە نمایشکراون.

لە کۆنگرەی رۆژنامەوانی کۆتایی هاتنی سێھەمین خولی پێشەنگای نێودەوڵەتی سلێمانی بۆ کتێب، رێکخەرانى پێشەنگاکە رایانگەیاند: بەراورد بە ساڵانى رابردو، بۆ ئەمساڵ پێشەنگاکە هەم لەروى بەشداربوانەوە و هەم لە روى رێکارە ئیدارییەکانەوە، لە ئاستێکى بەرزتردا بووە.

ئاشکراشیان کرد، رۆژانە (15) بۆ (20) هەزار کەس سەردانى پێشەنگاکەیان کردووە.

رێکخەرانى پێشەنگاکە ناوەڕۆکى راپرسیەکیان خستەڕو و تێیدا دەردەکەوێت کە بۆ ئەمساڵ تەنها لە رێگەى پەیجەکانى پێشەنگاکەوە ئاستى بینینى پێشەنگا لە سۆشیال میدیا یەک ملیۆنى تێپەڕاندووە.

هاوکات، (81%) ى ئەو ناوەندو چاپ و بڵاوکراوانەى لە پێشەنگاکە بەشداریان کردووە لە ئاستى پێشکەوتوى پێشەنگاکە رازى بون و () یان ئامادە بۆ ساڵى داهاتوو بەشدارببنەوە و گرێبەستى ساڵى داهاتوو ئەنجام بدەن.

هەر بەپێى راپرسییەکە، بەشێوەیەکى گشتى (94%)ى میوانان رازیبون لە بەدەمەوەچونى و شێوازى هاوکاریکردنى تیم و ستافى پێشەنگاکە و پێشکەشکردنى خزمەتگوزارییەکان.

رۆژى (18)ى نۆڤەمبەرى (2021)، سێهەمین خولى پێشەنگاى نێودەوڵەتى سلێمانى بۆ کتێب دەستى بە کارەکانى کرد کە تێیدا (200) ناوەندى چاپ و بڵاوکردنەوە لە ناوخۆى کوردستان و دەرەوە بە (380) هەزار ناونیشانى جیاواز بەشداریان کرد.

بەپێى لێدوانى رێکخەرانى پێشەنگاکە، زیاتر لە هەزار کەس لە دەرەوەى عێراق و هەزارن کەسیش لە شارە جیاوازەکانى عێراق بەشداریان کردووە.

پێشەنگاى نیودەوڵەتى کتێب ساڵانە لە (18)ى نۆڤەمبەر لە شارى سلێمانى کارەکانى دەستپێدەکات و بۆ ماوەى نۆ رۆژ بەردەوام دەبێت.