لە هەفتەى(10)ى خولی یانەکانى ئیسپانیا، یانەى بەرشەلۆنە لە یاریگاى کامپ نو، بە بەرچاوى زیاتر لە (86) هەزار هاندەر کلاسیکۆى بە ریاڵ مەدرید دۆڕاند.

لەخولەکی (31) ى یاریەکە و لە هێرشێکى هەلگەڕاوەدا داڤید ئەلابا لەیەکەم یارى کلاسیکۆ توانى گۆڵى یەکەم لە بەرژەوەندى ریال مەدرید تۆماربکات و گێمى یەکەم بەو گۆڵە کۆتایى پێهات.

گێمى دووەم یاریەکە ئاستێکى بەرزى بەخۆیەوە بینى و رۆنالد کومان ى راهێنەرى بەرشەلۆنە چەند گۆڕانکاریەکى ئەنجامدا، بەڵام بەخت یاوەرى تیپەکەى نەبووە تا لە کۆتاییەکانى یاریەکە و بەدیارى کراوى لە خولەکى (93) لۆکاس ڤاسکێس گۆڵى دووەمى بەخشیە مێرەنگى و هێندەى دیکە هاندەران یانە کەتەلۆنیەکەى بێهیواکرد.

هەرچەندە کۆن ئەگوێرۆ لەخولەکى (97)ى کۆتاییەکانى یاریەکە گۆڵێکى بۆ بەرشەلۆنە تۆمارکرد، بەڵام نەیتوانى تیمارى برینەکانى بەرشەلۆنە بکات و یارییەکەش بەم ئەنجامە لە بەرژەوەندى قەڵاى سپى کۆتایى هات.

لەدواى ئەم بردنەوەیەش ریال مەدرید سەرکەوتن بۆ پلەى دووەمى ریزبەندى خولی ئیسپانی و کۆی خاڵەکانى گەیاندە 20 خال ، هەرچى بەرشەلۆنە لەپلەى نۆیەم جێگیربووە بە کۆکردنەوەى 15 خاڵ