کۆمسیۆنى باڵاى سەربەخۆى هەڵبژاردنەکانى عێراق لەبارەى دوورخستنەوەى (135) کاندیدى هەڵبژاردنى داهاتوو روونکردنەوە دەدات و هۆکارى دوورخستنەوەکەشیان ئاشکرا دەکات.

جومانەى غەلاى، وتەبێژى کۆمسیۆنى باڵاى سەربەخۆى هەڵبژاردنەکانى عێراق رایگەیاند، دوورخستنەوەى ئەو کاندیدانە لەسەر بنەماى ئەو زانیاریانە بووە کە لەلایەن وەزارەتەکانى ناوخۆ و بەرگریەوە پێمان دراوە.

رونیشیکردەوە، دواى ئەوەى ناوى کاندیدەکانمان رەوانەى هەردوو وەزارەتەکە کرد، پێیان راگەیاندین کە (135) کاندید لە سلکى سەربازیدا کاردەکەن و بەردەوامیشن لەسەرکارەکانیان، بۆیە بەپشت بەستن بە یاساى هەڵبژاردن ئەو کاندیدانەمان دوورخستەوە.

وتەبێژى کۆمسیۆنى باڵاى سەربەخۆى هەڵبژاردنەکان لەبارەى خۆکاندیدکردنى کارمەندانى وەزارتەکانى ناوخۆ و بەرگرى روونکردنەوەى زیاترى داوە و لەوباریەوە رایگەیاندوە، ئەو کەسانەى لە سلکى سەربازیدا کاردەکە ن تەنها لەحاڵەتى خانەنشین بون یاخود دەست لە کارکێشانەوە لە کارەکانیان دەتوانن خۆیان کاندید بکەن، جگە لەوەش ئەو کارمەندانەى وەزارەتەکانى بەرگرى و ناوخۆ کە پلەى سەربازیان نیە دەتوانن خۆیان کاندید بکەن، بەڵام کارمەندانى دەزگاى ئاسایشى نیشتیمانى و دەزگاى هەواڵگرى بەهیچ شێوەیەک مافى خۆکاندید کردنیان نیە.

ئەوە لەکاتیکدایە رۆژى پێنج شەممەى رابردوو کۆمسیۆنى باڵاى سەربەخۆى هەڵبژاردنەکان دوورخستنەوەى (135) کاندیدى  راگەیاند، بەهۆى ئەوەى کە پلەى سەربازیان هەیە و کارمەندى وەزارەتەکانى ناوخۆ و بەرگرى عێراق.