زۆرینەوەی توێژینەوە پزیشكییەكان و تەندروستییەكان جەخت لەسەر زیانەكانی شەكری سپی دەكەنەوە، لەگەڵ بڵاوبونەوەی هۆشیاریش لەبارەی ئەو كێشە و نەخۆشی و گرفتە تەندروستیانەی شەكر دروستی دەكات، زۆر كەس لە بەكارهێنانی دووركەوتونەتەوە و هەوڵی ئەوەیان داوە جێگرەوە سروشتی و تەندروستەكانی بەكاربهێنن.

پسپۆڕەكان ئاماژە بەوە دەكەن، دەكرێت ماددە شیرینكەرە كەم كالۆرییەكان بەكاربهێنرێت، بەتایبەت ئەوانەی لەسەرچاوەیەكی سروشتییەوە بەرهەم دەهێنرێن، بەوەش كەسەكە تامێكی شیرین و بێ زیانی دەست دەكەوێت.

ماڵپەڕی (Only My Health) لە چاوپێكەوتنێكیدا لەگەڵ سۆمیتا بیسواس پسپۆڕی خۆراكی، باسی لە پێنج جێگرەوەی سروشتی شەكر كردووە كە دەتوانرێت پشتیان پێببەسترێت لەبری شەكری سپی.

1- هەنگوین: ماوەی سێ هەزار ساڵە هەنگوین بە ئاڵتونێكی شل ناودەبرێت، ئەوەش بەهۆی سودە تەندروستییە زۆرەكانی و بەكارهێنانە جیاوازەكانی.

توێژینەوەكان سەلماندویانە هەنگوین كاریگەرییەكی زۆری هەیە بۆ چاكبونەوە لە نەخۆشی و تایبەتمەندی دژە بەكتریای تێدایە، هەروەها سەرچاوەیەكی سەرەكی كالسیۆم و ئاسن و پۆتاسیۆم و مەگنسیۆمە.

2- جاگری (شەكری زەرد): شەكرێكی بۆر و زبری هیندییە، یەكێك بووە لە سەرچاوە سروشتییەكانی شەكر، لەكۆنەوە لە ئاسیا و ئەفریقا لە قامیشی شەكر دەرهێنراوە، ئەویش دوای ئەوەی قامیشەكە كوڵێنراوە دواتر پاڵێوراوە و كراوە بە قاڵب و لەپاڵ شیرینیدا فرۆشراوە.

شەكری زەرد سودی بۆ كرداری هەرس و چالاككردنی ئەنزیمەكان و جوڵەی ڕیخۆڵەكان بەرگری لەش هەیە، هەروەها پاكردنەوەی جگەر لە ژەهر.

3- گیراوەی قەند: گیراوەیەكی شیرینە لە داری قەیقەب دەردەهێنرێت، دەوڵەمەندە بە مەنگەنیز و زینك، هەروەها سەرچاوەیەكی سەرەكی دژە ئۆكسید و وزە بەخشێكی بەهێزە.

4- شەكری خورما: سودێكی زۆری هەیە و لەڕێی وشككردنەوەی خورما و دواتر هاڕینی دەستدەخرێت، ئەویش وزەیەكی زۆر دەبەخشێت، سەرچاوەیەكی سەرەكی پرۆتین و ئاسن، مس و زینك و مەنگەنیزە.

5- ستیڤیا: گەڵای ڕووەكی ستیڤیا بۆ دروستكردنی ماددەیەكی شیرین بەكاردەهێنرێت، ئەوەش دوای وشكردنەوە و هاڕینی كە لە زۆرینەی وڵاتانی ئاسیا باوە و دەتوانرێت بۆ شیرینكردنی چا و خواردنەوە گەرمەكان بەكاربهێنرێت، سودەكەشی لە كەمی كالۆرییەكەی و بەرزنەكردنەوەی ڕێژەی شەكری خوێندایە