ئەو کەسانەی غودەی سامیان هەیە هەست بە دڵە کوتێ و دەست لەرزین و ئارەقەکردنەوە دەکەن، زۆر لە نەخۆشەکان بێ تەحەمول و قەلەق دەبن و زوو هەڵەچن، دەروونیان گەرم دەبێ و بەرگەی گەرما ناگرن، ئیشتیهای خواردنیان زیاددەکا، بەڵام کێشیان دادەبەزی، لە ئافرەتان تێکچوونی سووڕی مانگانە یەکێکە لە نیشانەکانی غودە.

بۆ دەستنیشان کردنی غودەی سام پێویستە پشکنینی فرمانی غودەکان و پشکنینی خوێن و هەندێ پشکنینی بەرگری  و سۆناری مل یش بکرێ.

چارەسەری غودەی سام بە دەرمانی تایبەت دەکرێ، بەڵام پێویستە بۆ ماوەی (1-2) ساڵ چارەسەر وەرگرێ بۆ ئەوەی حاڵەتەکەی سەرهەڵنەداتەوە.

ئەگەر دوای دوو ساڵیش لە وەرگرتنی عیلاج هەر باش نەبوو، یان غودەکەی زۆر گەورە و ناشیرین بوو یان تووشی تەنگەنەفەسی و گران قوتدانی خواردن بوو یان گرێی شێرپەنجەیی هەبوو ئەوا  پێویستە نەشتەرگەری بۆ بکرێت بۆ  لابردنی غودەکە، هەندێ حاڵەتی غودەی سام بە چارەسەری تیشکی عیلاج دەکرێن.

د.داهات حەوێزی
پزیشکی پسپۆری هەناوی و شەکرە