پنتاگۆن ئەنجامی هێرشە ئاسمانییەکەی سەر سوریا ئاشکرادەکات

KNN : Kurdish News Network
09:38 - 02/03/2021
جیهان

وتەبێژی وه‌زاره‌تی به‌رگری ئه‌مه‌ریكا "پنتاگۆن" رایگه‌یاند، له‌ دوایین هێرشی ئه‌مه‌ریكا بۆ ‌سه‌ر سووریا له‌ هه‌فته‌ی رابردوو، چه‌كدارێك كوژراوه‌ و (2) چه‌كداری دیكه‌ش برینداربوون، كه‌ سه‌ر به‌ میلیشیایه‌كن، له‌لایه‌ن ئێرانه‌وه‌ پشتیوانی ده‌كرێن.

 

 
جۆن كێربی، وتەبێژی وه‌زاره‌تی به‌رگری وتی: "به‌رده‌وام هه‌ڵسه‌نگاندن ده‌كه‌ین، ئه‌گه‌ر گۆڕانكاری له‌ زانیارییه‌كان هه‌بێت، به‌ دڵنیاییه‌وه‌ ئاگادارتان ده‌كه‌ینه‌وه‌".

 

پنتاگۆن رۆژی هه‌ینی رابردوو رایگه‌یاند، كه‌ هێزی ئاسمانی ئه‌مه‌ریكا، لێدانی ئاراسته‌ی چه‌ند شوێنێكی خاكی سووریا كرد و فڕۆكه‌‌كانیان توانیویانه‌ (9) پێگه‌ به‌ ته‌واوه‌تی تێكبشكێنن، له‌گه‌ڵ چه‌ند به‌شێكی (2) شوێنی دیكه‌ .

 

ئێران له‌لایه‌ن خۆیه‌وه‌ هێرشه‌ ئاسمانییه‌كه‌ی ئه‌مه‌ریكای ئیدانه‌كرد و به‌ "دوژمنكارییه‌كی نایاسایی و پێشێلكاریی مافی مرۆڤ و یاسا نێوده‌وڵه‌تییه‌كان" هه‌ژماری كرد.

143 جار خوێندراوەتەوە