پێشنیار دەکرێت هەر دو مادەى راگەیاندن و یاسا بخرێتە پڕۆگرامى خوێندنەوە

01:34 - 16/10/2020
عێراق

لیژنه‌ی په‌روه‌رده لە ئەنجومەنى نوێنه‌رانى عێراق رایدەگەیەنێت، هه‌وڵێك هەیە بۆ دانانی هه‌ر دو ماده‌ی راگه‌یاندن و یاسا له‌ پرۆگرامه‌كانی خوێندن.

قوصه‌ی یاسری سه‌رۆكی لیژنه‌ی په‌روه‌رده و خوێندنى باڵا لە ئەنجومەنى نوێنه‌رانى عێراق بە ئاژانسی هه‌واڵی عێراقی راگەیاندوە، لیژنەکەیان نوسراوی ئاڕاسته‌ی وه‌زاره‌تی په‌روه‌رده‌ كردوه‌ بۆ دانانی هه‌ر دو ماده‌ی راگه‌یاندن و یاسا له‌ پڕۆگرامه‌كانی خوێندن.

وتیشى؛ وەزارەتى پەروەردە ئه‌و پرسه‌ تاوتوێ ده‌كات بۆ ئه‌وه‌ی بڕیاری له‌باره‌وه‌ بدات.

ئاماژەى بەوەکرد، هه‌ندێك راگه‌یاندنكار و سه‌ندیكای پارێزه‌ران داوایان كردوه‌ هه‌ر دو ماده‌ی راگه‌یاندن و یاسا له‌ پڕۆگرامی خوێندن دابنرێت.

سه‌رۆكی لیژنه‌ی په‌روه‌رده لە ئەنجومەنى نوێنه‌رانى عێراق ئەوەشى خستەڕوو، سه‌رجه‌م بڕیاره‌كانی وه‌زاره‌تی په‌روه‌رده‌ به‌ هه‌ماهه‌نگی له‌گه‌ڵ لیژنه‌ی په‌روه‌رده‌ی ئەنجومەنى نوێنه‌ران دراوه‌ و زۆرێك له‌ پێشنیاره‌كان لیژنه‌كه‌ پێشكه‌شی كردووه‌ و وه‌زاره‌تی په‌روه‌رده‌ش په‌سه‌ندیكردوه‌ و جێبه‌جێ كراوه.

539 جار خوێندراوەتەوە