وەزیرى پەروەردە: موچەى هیچ وەزارەتێک نەدراوە تاوەکو موچەى مامۆستایان فەرامۆش بکرێت

10:19 - 29/09/2020
کوردستان

وەزیرى پەروەردەى هەرێم رایدەگەیەنێت، خوێندن لەمساڵدا رەهەندێکى تەندروستى هەیە، دەشڵێت: ناتوانم بەرپرسیارێتى کردنەوەى دەرگاى قوتابخانەکان بگرمە ئەستۆ.

 

 
ئالان حەمە سەعید وەزیرى پەروەردەى هەرێم لە چاوپێکەوتنێکدا لەگەڵ دیجیتاڵ میدیاى (KNN)، باسى لە بایکۆتى مامۆستایان و بژاردەى خوێندن بە شێوەى ئەلکترۆنى کرد و وردەکارى شێوازى خوێندنەکەى خستەڕوو.

 

 

وەزیرى پەروەردەى هەرێم لە چاوپێکەوتنەکەى (KNNC)دا لەبارەى دەستپێکردنى خوێندنى ئەمساڵ بەشێوەى ئەلکترۆنى و گرفتەکانى شێوازەکە؛ وتى: لە گوند و ناوچە دورەدەستەکان دەسەڵات دراوە بە بەڕێوەبەرە گشتیەکانى پارێزگاکان و بەڕێوەبەرى پەروەردەکان دەتوانن لەو ناوچانەدا خوێندن لە ناو پۆلدابێت.

 

 

ئاماژە بەوەش کرد، ساڵى رابردوو بۆ ماوەى (11) رۆژ سیستمى خوێندنى ئەلکترۆنى لە هەرێم تاقیکراوەتەوە و سەرکەوتوبوە، پارێزگاى سلێمانیش لەسەر ئاستى هەرێمى کوردستان بەرزترین رێژەى بەشداریکردنى ئەو سیستمى خوێندنەى هەبوە لەلایەن قوتابیان و خوێندکارانەوە.

 

ئالان حەمە سەعید راشیگەیاند، سەربارى ئەوەى خوێندکار بەشێوەى ئەلکترۆنى لە ماڵەوە وانە دەخوێنێت، بەڵام هەفتانە دەبێت بچنەوە قوتابخانە و لەگەڵ مامۆستاکاندا پێداچونەوە بەو وانانەدا بکەن کە بەشێوەى ئەلکترۆنى خوێندویانە.

 

 

لەبارەى بایکۆتى مامۆستایان و داواکاریەکانیان بۆ پێدانى موچە، وەزیرى پەروەردەى هەرێم وتى: هەموو مامۆستایان هەست بە بەرپرسیارێتى دۆخەکە دەکەن، لە ئێستاشدا هیچ وەزارەتێک موچەى وەرنەگرتوە تاوەکو موچەى مامۆستایان نەدرێت.

 

 

وەزیرى پەروەردەى هەرێم باسى لە خراپى دۆخى ئابورى هەرێم کرد و ئاماژەى بەوەکرد، دۆخە داراییەکە گشتیە و بەپێى زانیاریەکان لە عێراقیش چەندین رۆژە پێدانى موچە لەلایەن حکومەتى ناوەندەوە دواکەوتوە.

485 جار خوێندراوەتەوە