بكوژێكی سزادراو بە لەسێدارەدان، دەبێتە پەرلەمانتار

KNN : Kurdish News Network
11:57 - 09/09/2020
هەمەڕەنگ

سیاسەتمەدارێكی سریلانكی كە بە تۆمەتی كوشتنی بە ئەنقەست سزای لەسێدارەدانی بۆ دەرچووە، لە زیندانەوە دەبرێتە هۆڵی پەرلەمان بۆئەوەی وەكو پەرلەمانتار سوێندی یاسایی بخوات، ئەوەش رەخنەی لایەنەكانی ئۆپۆزسیۆنی لێدەكەوێتەوە.

بەپێی هەواڵێكی رۆژنامەی گاردیانی بەریتانی، بریمالال جایاسیكارا كە تەمەنی (45) ساڵە و ئەندامی حزبی سریلانكا بۆدۆگانا بیرامۆنای دەسەڵاتدارە، لەمانگی ئابی رابردوودا تۆمەتی كوشتنی بەئەنقەستی بەسەردا ساغبۆتەوە، دوای ئەوەی لە گردبونەوەیەكی هەڵبژاردنەكانی ساڵی (2015) یەكێك لە چالاكەوانەكانی ئۆپۆزسیۆنی كوشتووە.

رۆژنامەكە باسی لەوە كردووە، بەوپێیەی تۆمەتباركردن و سزادانەكەی لە مانگی ئابی رابردوودا بووە و دوای ئەوەبووە كە جایاسیكارا خۆی بۆ هەڵبژاردنەكان كاندیدكردووە، بۆیە توانیوێتی بەشداری هەڵبژاردن بكات و كورسییەكەی بباتەوە.

بەرپرسانی زیندان رەتیانكردۆتەوە ئەو پەرلەمانتارە بەشداری یەكەم دانیشتنی پەرلەمان بكات كە لە 20 مانگی ئاب ئەنجامدرا، ئەویش داواكارییەكی پێشكەشی دادگای پێداچونەوە كردووە، ئەوانیش رێگەیانداوە لە زیندانەوە ببرێتە هۆڵی پەرلەمان تا وەك پەرلەمانتارێك مافەكانی پێشێل نەكرێت، بۆیە بەشداری دانیشتنەكەی پەرلەمانى كرد و دواتر برایەوە زیندانەكەی.

ئەو هەنگاوە ناڕەزایەتییەكی زۆری لایەنەكانی ئۆپۆزسیۆنی لێكەوتووە، بەشێكیان بە بەستنی پەڕۆیەكی رەش نیگەرانی خۆیان دەربڕی، ژمارەیەكی دیكەش لەو دانیشتنە كشانەوە كە بریمالال جایاسیكارا سوێندی یاسایی تێداخوارد.

بریمالال لە گردبونەوەیەكی هەڵبژاردنەكاندا لە مانگی كانونی دووەمی ساڵی (2015) تەقەی كرد و بەهۆیەوە كەسێك كوژرا، دوای چەند ساڵێكیش دادگا بە تۆمەتی كوشتنی بە ئەنقەست سزای لەسێدارەدانی بۆ دەركرد.

607 جار خوێندراوەتەوە