بەڕێوەبەرایەتی گشتی پەروەردەی هەولێر رایدەگەینێت، تاقیکردنەوەکانی خولی دوەمی پۆلە ناکۆتاکان و قۆناغەکانى ناکۆتا لە خوێندنی پیشەیی و ئیسلامی، دواخرا بۆ ڕۆژی (16/8/2020).

لە راگەیەندراوێکدا بەڕێوەبەرایەتی گشتی پەروەردەی هەولێر ئاماژە بەوە دەکات، دوای تاوتوێکردن و هەڵسەنگاندنی دۆخى تەندروستی و ڕای پارێزگار و بەڕێوەبەرایەتی گشتی تەندروستی هەولێر و پەروەردەی قەزاکان و بەڕێوەبەرایەتی سەرپەرشیکردن بەمەبەستی ڕەچاوکردنی ڕەوشی تەندروستی، بڕیاردراوە تاقیکردنەوەکانی خولی دوەمی پۆلە ناکۆتاکان لە قۆناغى (4)ى بنەڕەتى تا (11)ى ئامادەیى و قۆناغە ناکۆتاکانى خوێندنی پیشەیی و ئیسلامی دوابخرێت بۆ ڕۆژی (16/8/2020).

پێشتر وەزارەتى پەروەردەى هەرێم بڕیاریدا لە بەروارى (9/8/2020) تاقیکردنەوەکان ئەنجام بدرێت و دەسەڵاتیش درا بە بەڕێوەبەرى گشتى پەروەردەى پارێزگاکان بۆ بەڕێوەبردن و کۆتایی هێنان بە تاقیکردنەوەکان بەڕەچاوکردنی دۆخى تەندروستی.