ئەندامێکى جڤاتى نیشتیمانى: دەبێت یەکێتى و پارتى بگەنە ئەو باوەڕەى کە تەنها چاکسازى دەتوانێت بەردەوامیان پێبدات

06:14 - 09/07/2020
کوردستان

ئەندامێکى جڤاتى نیشتیمانى بزوتنەوەى گۆڕان رایدەگەیەنێت، ئامانجى سەرەکى بەشداریکردنى بزوتنەوەى گۆڕان لە حکومەتدا، جێبەجێکردنى چاکسازیە، دەشڵێت: دەبێت یەکێتى و پارتى بگەنە ئەو باوەڕەى کە تەنها چاکسازى دەتوانێت بەردەوامیان پێبدات.

نەسرەدین مەحمود باژێڕوانى مەکۆى کفرى بزوتنەوەى گۆڕان و ئەندامى جڤاتى نیشتیمانى لە لێدوانێکدا بۆ دیجیتاڵ میدیاى (KNN) رایگەیاند، وەک هەستکردن بە بەرپرسیارێتى؛ بزوتنەوەى گۆڕان داواى لە لایەنەکان کردوە دەست بە چاکسازى گشتگیر بکرێت و هاوڵاتیانى هەرێمى کوردستان لەم دۆخە قەیراناویە دەربازبکرێت.

دەشڵێت: ئەگەر دۆخەکە و قەیرانەکانى ئێستا بەمشێوەیە بەردەوامبن، دۆخەکە دەکەوێتە مەترسیەوە و بزوتنەوەى گۆڕانیش لە کۆبونەوەکانى لەگەڵ یەکێتى و پارتى بە ئاشکرا ئەو مەترسیانە و پێویستى دەستکردن بە چاکسازى بۆ لایەنەکان خستوەتەڕوو.

نەسرەدین مەحمود رایگەیاند، ئامانجى سەرەکى بەشداریکردنى بزوتنەوەى گۆڕان لە حکومەتدا، جێبەجێ کردنى ئەو بەرنامە و پڕۆژە چاکسازیەیە، کە کردویەتى بەبنەماى رێککەوتنەکانى لەپێناو چارەسەرى دۆخى هەرێم و قەیرانەکان و باشکردنى بژێوى ژیانى خەڵک.

باژێڕوانى مەکۆى کفرى بزوتنەوەى گۆڕان ئاماژە بەوەش دەکات، دەبێت یەکێتى و پارتى بگەنە ئەو باوەڕەى کە تەنها چاکسازى دەتوانێت بەردەوامیان پێبدات و ئەگەر چاکسازى نەکرێت ناتوانن بەردەوام بن و رەنگە بارودۆخەکە خراپتربێت و خەڵک دۆخەکە بەمشێوەیەى ئێستا قبوڵ ناکات، بۆیە تەنها دەرچە لەبەردەم چارەسەرى دۆخەکەدا دەستکردنە بە چاکسازى گشتگیر و پێویستە رۆژێک زوتر هەوڵ بۆ جێبەجێکردنى چاکسازى بدرێت.




370 جار خوێندراوەتەوە