وەزارەتی دەرەوەی تورکیا وەڵامی عێراق دەداتەوە

09:35 - 05/07/2020
عێراق

وەزارەتی دەرەوەی تورکیا وەڵامی حکومەتی عێراق دەداتەوە و رایدەگەیێنێت، تورکیا لە دژی هەر چالاکییەکی رووخێنەر کە لە خاکی عێراقەوە دەکرێتە سەر سنوور، ئاسایش و سەقامگیرییەکەی، لە چوارچێوەی یاسای بەرگریلەخۆکردنی نێودەوڵەتیی رەوادا پێداگر دەبێت لەسەر گرتنەبەری رێوشوێنی پێویست.

 

لە راگەیەنراوێکدا وتەبێژی وەزارەتی دەرەوەی تورکیا وەڵامی سەرۆکایەتیی ئەنجوومەنی وەزیران و وەزارەتی دەرەوەی عێراقی دایەوە و رایگەیاند،"ئێمە پێشتر وەڵامی پێگەکانی عێراقمان دابووەوە لەبارەی ئۆپەراسیۆنەکانی چڕنووک دژی پەکەکە کە عێراقی کردووەتە مۆڵگەی خۆی، لەمبارەیەوە چەند روونکردنەوەیەکی تازە و بێبنەما لەلایەن پێگەکانی عێراقەوە هاتوون.

 

باس لەوەشکراوە "جارێکی دیکە ئەمە بەبیر دەخەینەوە کە ئامادەی هاوئاهەنگیین بۆ بەرەنگاربوونەوەیەکی هاوبەشانە دژی پەکەکە کە ئاسایشی عێراقیشی خستووەتە ژێر هەڕەشە و پێشێلی سەروەرییەکەی کردووە".

 

دەشڵێت،"تا ئەو کاتەی ئەم چاوەڕوانییە بەبێ وەڵام بمێنێتەوە، تورکیا لە دژی هەر چالاکییەکی رووخێنەر کە لە خاکی عێراقەوە دەکرێتە سەر سنوور، ئاسایش و سەقامگیرییەکەی، لە چوارچێوەی یاسای بەرگریلەخۆکردنی نێودەوڵەتیی رەوادا پێداگر دەبێت لەسەر گرتنەبەری رێوشوێنی پێویست".

10712 جار خوێندراوەتەوە