تەرمى منداڵێکى تەمەن دوو ساڵ گەیشتە نەخۆشخانەى گشتى رانیە و کەسوکارى منداڵەکەش رایدەگەیەنن، منداڵەکەیان کەوتوەتە ناو حەوزى ئاو و خنکاوە.

راگەیاندنى بەڕێوەبەرایەتى پۆلیسى راپەڕین ئاشکراى دەکات، ئەمشەو پێنج شەممە (28/5/2020) تەرمى منداڵێکى تەمەن دوو ساڵ گەیەندراوەتە نەخۆشخانەى گشتى رانیە، کە دانیشتوى گەڕەکى راپەڕینە لە ناحیەى چوارقوڕنە و دواى پشکنینى توێکارى لە پزیشکى دادوەرى رانیە، تەرمەکەى رادەستى کەسوکارەکەى کراوەتەوە.

دیجیتاڵ میدیاى KNN زانیویەتى، کە منداڵەکە لە رەگەزى مێیە و درەنگانى ئێوارەى ئەمڕۆ تەرمەکەى گەیەندراوەتە نەخۆشخانەى گشتى رانیە.

پۆلیسى راپەڕین ئەوەش دەخاتەڕوو، کە بەوتەى کەسوکارەکەى؛ منداڵەکە کەوتوەتە ناو حەوزى ئاوەوە و خنکاوە، ئاماژە بەوەش دەکەن پەڕاوى لێکۆڵینەوە بۆ روداوەکە کراوەتەوە و لێکۆڵینەوەکان بەردەوام دەبن.

پێشتر دیجیتاڵ میدیاى KNN پەیوەندى بە رائید شۆڕش ئیسماعیل وتەبێژى پۆلیسى راپەڕین کرد و ناوبراو رایگەیاند، لێکۆڵینەوە لە روداوەکە دەکەن و بەپێى زانیاریەکانیش هیچ کەسێک لەسەر روداوەکە دەستگیر نەکراوە.