گێلاس یەكێك لەو میوە بەتامانەیە لەم وەرزەدا لە بازاڕەكاندا بونی هەیە، بەهۆی تامە تایبەتەكەیەوە كەسانێكی زۆر حەز بە خواردنی دەكەن، بەڕای پسپۆڕانی تەندروستیش خواردنی ئەو جۆرە میوەیە، چەندین سودی هەیە، بەهۆی دەوڵەمەندی بە چەندین ڤیتامین و ماددەی خۆراكی، لەش لە چەندین نەخۆشی دەپارێزێت.
ئەو ڤیتامینانەی لە پێكهاتەی گێلاسدان بریتین لە ڤیتامینەكانی ئەی و بی و سی و دی، هەروەها چەندین كانزا و ماددەی خۆراكی دیكەی تێدایە.
بەپێی ئەنجامی چەند توێژینەوەیەكی پزیشكی ئەوانەی لەمانگی ڕەمەزان لەپارشێو و بەربانگدا گێلاسیان خواردووە، كەمتر هەستیان بە تینوێتی كردووە، هەروەها وزە و توانایەكی زۆریان هەبووە ئەمە جگە لەوەی میوەكە سودی بۆ باری دەرونی هەبووە و ڕێگربووە لە توڕەبوون.
خواردنی گێلاس یارمەتی كرداری هەرسكردن دەدات، ئەمە جگە لەوەی خۆی میوەیەكە بە ئاسانی هەرس دەبێت هەروەها دەتوانرێت بەشێوەی شەربەت ئامادە بكرێت، ئەویش جگە لە تامە تایبەتەكەی چەندین سودی دیكەی بۆ لەش هەیە.
گێلاس خوێن لە ژەهر و میكرۆبە زیان بەخشەكان پاكدەكاتەوە، یەكێكیشە لەو میوانەی كە سودێكی زۆری بۆ گورچیلە هەیە، هاوكات ڕێ لە قەبزی دەگرێت سودی بۆ ئەو كەسانە هەیە كە بەدەست كێشەكانی كۆڵۆنەوە دەناڵێنن.
ئەو میوەیە ڕێ لە گیرانی دەمارەكانی خوێن دەگرێت، بەوەش ئەگەری توشبوون بە جەڵتە كەمدەبێتەوە، هەروەها بۆ ئەو كەسانەش بە سوودە كە تووشی نەخۆشیەكانی جومگە و رۆماتیزم دەبن.
ئەو شەكرەی لە گێلاسدایە لە جۆری (لاكتۆزە) بۆیە ئەو كەسانەی توشبووی شەكرەن دەتوانن بە ئاسانی بیخۆن، بێ ئەوەی هیچ كاریگەریەكی خراپی بۆیان هەبێت و ڕێژەی شەكری خوێنیان بەرزببێتەوە.
گێلاس سودی بۆ دابەزاندنی كێش هەیە، چونكە بڕێكی كەم یەكەی گەرمۆكە لە پێكهاتەكەیدایە، بە جۆرێك لە 25 دەنگ گیلاسدا، تەنها 15 یەكەی گەرمۆكە بونی هەیە.
پسپۆڕانی تەندروستی ئاماژە بەوە دەكەن گێلاس جگە لە بەرەكەی دەتوانرێت سود لە لاسك و گەڵاكەشی ببینرێت و دەبێتە هۆی ڕزگاربوون لەكێشەكانی گورچیلە و ئەگەری دروستبونی بەرد كەمدەكاتەوە.
4899 جار خوێندراوەتەوە