پەرلەمانی ئیسرائیل بە زۆرینەی دەنگ متمانەی دا بە کابینەی نوێی حکومەت بە سەرۆکایەتی بنیامین نەتانیاهۆ سەرۆکی پارتی لیکۆد.

 لە کۆبونەوەکەی پەرلەماندا 73 پەرلەمانتار بە بەڵی و 46 پەرلەمانتاریش بە نەخێر دەنگیان بە کابینەکەی نەتانیاهۆدا.

پێکهینانی ئەم کابینەی حکومەت لە ئیسرائیل بەپێی رێکەوتنێکی نێوان پارتی لیکۆد بە سەرۆکایەتی نەتانیاهۆ و هاوپەیمانی شین و سپی بە سەرۆکایەتی بێن گانتزە کە هەردووکیان خاوەنی زۆرترین کورسی پەرلەمانن.

رێکەوتنەکەش بەجۆرێکە حکومەتەکە تەمەنی 3 ساڵ دەبێت و 18 مانگی یەکەم نەتانیاهۆ سەرۆکایەتی بکات و 18 مانگی دووەم بێن گانتز سەرۆکایەتی کابینەکە بکات.

لەماوەی ساڵ و نیو ڕابردوو سێ هەڵبژاردنی پێشوەختە لە ئیسرائیل بەڕێوەچوو و هەموو جارەکان هەردوو حزبەکە کورسیەکانیان نزیک بوو لە یەکەوە نەیانتوانی کابینەی نوێ پێکبهێنن سەرئەنجام رێکەوتنیان ئەنجامدا.