قەدەغەى هاتوچۆ بەردەوام دەبێت و ئاسانکارى تەواو بۆ ژیانى هاوڵاتیان دەکرێت

01:16 - 05/04/2020
کوردستان

بەڕێوەبەری پۆلیسی سلێمانی ڕایگەیاند، دوای بریارەکەی وەزارەتی ناوخۆ بە پلان و رێنمایی نوێوە قەدەغەی هاتوچۆ بەردەوام دەبێت.

 

عەمید ئاسۆ تەها بەڕێوەبەری پۆلیسی پارێزگای سلێمانی لە لێدوانێکی تایبەتدا بە دیجیتاڵ میدیای KNNی ڕاگەیاند، لە کۆبونەوەی لیژنەی باڵای ئۆپراسیۆنەکانی پارێزگای سلێمانی بۆ بەرەنگاربوونەوەی کۆرۆنا کۆمەڵێک بڕیار و ڕێنمایی نوێ دەردەکەن، بۆ ئەوەی دوای قەدەغە 48 کاتژمێرییەکە ژیانی هاوڵاتیان ئاسایی بکرێتەوە.


وتیشی، قەدەغەی هاتوچۆ هەر بەردەوام دەبێت، بەڵام کۆمەڵێک ئاسانکاری بۆ ژیانی هاوڵاتیان دەکرێت، نابێت هاوڵاتیان پێشێلی ڕێنماییەکان بکەن.


سەبارەت بەو ڕێکارانەی دەگیرێنە بەر بەرێوەبەری پۆلیس وتی، هەرکاتێک هاوڵاتیان هاتنە دەرەوە دەبێت دەستکێش و ماسک بەکاربهێنن و خۆیان بەدور بگرن لە هەموو جۆرە قەرەباڵغییەک.


باسی لەوەشکرد، لەماوەی سێ هەفتەی قەدەغەی هاتوچۆدا ئاستی تاوانەکان لە سنوری پارێزگای سڵیمانی گەیشتۆتە سفر.

51486 جار خوێندراوەتەوە