وەزیری دەرەوەی قەتەر سەردانی عێراق و هەرێم دەكات

11:10 - 15/01/2020
عێراق

وەزیری دەرەوەی قەتەر سەرلەبەیانی ئەمڕۆ بە سەردانێك گەیشتە بەغداد و دوانیوەڕۆش بۆ كۆبوونەوە لەگەڵ بەرپرسانی هەرێم دێتە هەولێر. 

محەمەد بن عەبدولڕەحمان ئالسانی  جێگری سەرۆك وەزیران و وەزیری دەرەوەی قەتەر بەیانی ئەمڕۆ بە سەرۆكایەتی وەفدێك گەیشتە بەغداد و بڕیارە لەگەڵ هەرسێ‌ سەرۆكایەتییەكەی عێراق و وەزیری دەرەوەی عێراق كۆببێتەوە و گفتوگۆ بكەن سەبارەت بە كێشەكانی ئەم دواییەی عێراق و نێوەندگیری لە نێوان ئێران و ئەمریكادا. 

بڕیاریشە دواتر كۆنگرەیەكی رۆژنامەوانی لەگەڵ وەزیری دەرەوەی عێراق سەبارەت بە ئامانجی سەردانەكە و ناوەڕۆكی گفتوگۆكان لە شاری بەغداد رێكبخات. 

بڕیاریشە دوای تەواوبوونی دیدار و كۆبوونەوەكانی لەگەڵ بەرپرسانی عێراق، وەزیری دەرەوەی قەتەر سەردانی هەولێر بكات و لەگەڵ سەرۆكی حكومەت و بەرپرسانی دیكەی هەرێم كۆبێتەوە. 

318 جار خوێندراوەتەوە