راهێنەری پێشووی یانەی بەرشەلۆنە، دوای لابردنی لە پۆستەکەی، نامەیەکی "کاریگەری" ماڵئاوایی ئاڕاستەی یاریزان، ئیدارە و هاندەرانی یانەکە کرد.

ڤاڵڤێردی لە نامەکەیدا کە پێگەی فەرمی بەرشەلۆنە بڵاویکردووەتە دەڵێت، " رۆڵی من وەک راهێنەری بەرشەلۆنە کۆتایی هات، چەندین ساتی خۆشم لەگەڵ یانەکەدا بەسەربرد، ئاهەنگی سەرکەوتن و بەدەستهێنانی چەندین نازناومان گێڕا، لەگەڵ ئەوەشدا کاتی سەختمان بەڕێکرد، پێش هەموو شتێک، دەمەوێت ئاماژە بە خۆشەویستیی و رێزی هاندەرانی یانەکە بکەم، لەو ماوەیەی من راهێنەر بووم."

ڤاڵڤێردی سوپاسی سەرۆکی یانەی بەرشەلۆنە دەکات و دەنووسێت، "دەمەوێت سوپاسی جۆسێپ ماریا بارتومیۆ و ئیدارەی یانەکە بکەم، کە هەلی سەرکردایەتیکردنی یانەکەیان پێبەخشیم و بە درێژایی ماوەی راهێنەریم متمانەیەن پێدام."

لەدرێژەی پەیامەکەیدا باس لەوە دەکات، " سوپاسی هەموو ئەو کەسانە دەکەم لە ماوەی دوو ساڵ و نیودا هاوکارم بوون، بەتایبەت ئەوانەی لە تیپی یەکەمی یانەکەدا کاردەکەن، کە کاتی راهێنان و گەشتم لەگەڵدا بەسەر بردن."

راهێنەری پێشووی بەرشەلۆنە سوپاسی یاریزانەکان دەکات، " دەمەوێت سوپاسی یاریزانەکان بکەم بۆ هەموو ئەو هەوڵەی پێشکەشیان کرد و توانیمان پێکەوە چوار نازناو بەدەستبهێنین."

لە کۆتایی نامەکەشیدا ڤاڵڤێردی هیوای سەرکەوتن بۆ یانەکەی پێشووی دەخوازێت، "لە ئێستاوە، هیوای سەرکەوتن بۆ ئێوە و راهێنەری نوێ کیکی سیتین دەخوازم، بژی بەرشەلۆنە، بژی کەتەلۆنیا."

ڤاڵڤێردی لە ساڵی ٢٠١٧ەوە راهێنەری یانەی بەرشەلۆنە بوو، سەرکردایەتی یانەکەشی کرد بۆ بەدەستهێنانی دوو نازناوی خولی ئیسپانیا، جامی ئیسپانیا و جامی سوپەری ئیسپانیا.