ئەحمەد داودئۆغڵو دۆسیەی حزبە نوێکەی رادەستی وەزارەتی ناوخۆ کردووە و چاوەڕوانیش دەکرێت سبەینێ بە فەرمی رابگەیەندرێت.

ئەمڕۆ ئەحمەد داودئۆغڵو سەرۆک وەزیرانی پێشووی تورکیا و یەکێک لە دامەزرێنەرانی پارتی داد و گەشيپێدانی دەسەڵاتدار، بۆ دامەزراندنی حزبە نوێکەی داواکاری تۆمارکردووە و دۆسیەکەی رادەستی وەزارەتی ناوخۆ کردووە.

ئایهان سەفەر سەرۆکایەتی ئەو گروپەی کردووە کە لە چوار کەس پێکهاتوون و سەردانی وەزارەتی ناوخۆیان کردووە بۆ پێشکەشکردنی داواکاری پێدانی مۆڵەت بە حزبە نوێکەی داودئۆغڵو.

دەربارەی ناوی حزبەکە چەند زانیارییەکی پشتڕاستنەکراوە بڵاوکراونەتەوە، لەوانەش ناوەکانی وەک حزبی داهاتوو، حزبەکەمان، حزبی ژیان و داد، بەڵام ئەگەر زۆرە ناوی حزبی داهاتوو (گەلەجەک پارتی) بێت.

بۆ لۆگۆی حزبە نوێکەش ئەوەی بڵاوکراوەتەوە، گەڵای چنارە و لە خوارەوەیدا نوسراوە حزبی داهاتوو.

بڕیار وایە سبەینێ هەینی لە شاری ئەنقەرە بە فەەرمی پارتە نوێکە رابگەیەندرێت و ناو و لۆگۆی پارتەکەش ئاشکرا بکرێت.